Komandu PNTL kontinua aposta formasaun ba polísia feminina
DILI, 08 marsu 2021 (TATOLI)-Komandu Polísia Nasionál Timor-Leste (PNTL) liuhosi Departamentu Jéneru kontinua aposta programa formasaun ba polísia feminina hodi hakbiit sira nia koñesimentu no abilidade.
Xefe Gabinete Departamentu Jéneru PNTL, Superintendente Julia da Gama, formasaun ne’ebé Komandu Jeral PNTL fasilita ba polísia feminina sira nu’udar ona programa prioridade, hanesan mós formasaun ne’ebé foin lalais halo iha Akademia PNTL ba polísia feminina ho postu inspetór xefe ho inspetór ho baze ne’ebé alínea ho planu estratéjiku PNTL ba feto nian tinan 2018-2022 .
Liuhosi komemorasaun loron mundiál ba feto, segunda ne’e, Xefe Gabinete Departamentu Jéneru PNTL, Superintendente Julia Gama, hateten formasaun ba polísia feminina atu bele presta servisu hodi kontribui ba dezenvolvimentu instituisaun.
“Formasaun sira ne’e ba ita-nia polísia feminina atu tempu ruma ita hakarak nomeia ita-nia polísia feminina sai nu’udar adida seguransa iha rai-li’ur,” tenik Julia Gama ba Agência Tatoli iha nia servisu fatin, Dili.
PNTL daudaun iha membru feto hamutuk na’in-417, entre sira-ne’e postu aas liu foin na’in ida maka Superintendente Xefe Natércia Eufrásia Martins, no tuir mai maka superintendente na’in-rua inklui Superintendente Julia Gama, na’in-30 amak inspetór xefe no na’in 200-resin mak funsiona hanesan xefia iha departamentu sira.
Jornalista : Nelson de Sousa
Editór : Francisco Simões
