IPG halo sosializasaun ba entidade relevante uha Viquuque konaba risku dezastre naturál, iha salaun administrasaun Viqueque, segunda (08/03). Imajen/Natalino Costa

VIQUEQUE, 08 marsu (TATOLI)–Ekipa Institutu Petróleu no Jeolojia (IPG, sigla portugés) halo sosializasaun ba autoridade no entidade relevante no halo estudu mapamentu ba risku dezastre naturál iha munisípiu Viqueque.

Diretór risku jeolójiku IPG, Eugênio Soares, hateten atividade hahú ho sosializasaun hodi aprezenta ba líder komunitáriu, Administradór no entidade relevente kona-ba risku dezastre naturál hafoin halo estudu mapamentu ba risku dezastre naturál.

“Ami-nia presenza atu halo atividade rua ne’e hodi identifika fatin risku ba dezastre naturál hanesan sizmu, rai halai, erozaun kosteira no tsunami,” Diretór ne’e dehan durante halo intervensaun iha salaun administrasaun munisípiu Viqueque, segunda ne’e.

Enkuantu, estudu ba mapamentu ne’ebé IPG halo sei hahú iha loron 10 marsu no fulan maiu nia rohan, ne’ebé sei realiza iha postu administrativu Lacluta, Ossu, Uatucarbau, Viqueque no Uatulari iha munisípiu Viqueque.

Tuir Responsável ne’e, estudu mapamentu importante tanba liuhosi atividade ne’e bele konsensiliza komunidade sira  atu labele  halo uma iha fatin risku ba dezastre.

“Tanba ne’e, ami halo sosializasun antes halo estudu mapamentu, nu’udar meiu ida hodi introdús ba autoridade lokál sira ne’ebé partisipa, nune’e sira bele hatene no apela ba komunidade labele halo uma iha fatin risku,” nia akresenta.

Rezultadu estudu mapamentu risku dezastre naturál rasik sei entrega ba Governu sentrál hodi ba futuru ajuda polítika Governu iha implementasaun ordenamentu territóriu.

Munisípiu Viqueque, kompostu hos postu administrativa lima, suku 35 no aldeia 200-resin, tanba ne’e Diretór IPG konsidera líder komunitáriu tenke kuidadu ninia populasaun no labele halo uma iha zona ne’ebé institutu identifika ona.

“Husu komunidade Viqueque atu kontribui ba estudu mapamentu ne’ebé IPG halo, nune’e komunidade sira bele metiga hodi ses-an hosi zona risku,” nia fó hanoin.

Iha fatin hanesan, Adjuntu Komadante Polísia munisípiu Viqueque, Superientidente Asistente Polísia, Inácio Amaral, apresia ho estudu mapamentu ne’ebé IPG halo tanba bele benefisia komuidade lokál.

“Ha’u husu ba autoridade lokál no kominidade atu tulun ekipa IPG hodi fó susesu ba estudu ne’e. Ha’u hanoin ida-ne’e importante, tanba munisípiu ne’e kada tinan sempre akontese inundasaun iha área Beaço, Alembata no iha zona kosteira. Tanba ne’e, espera bele fó alerta sedu ba komukidade hodi kuidadu-an no dook hosi zona risku sira,” nia apela.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here