Produtu Cesta Bázika. Imajen Tatoli/Antónia Gusmão.

DILI, 07 marsu 2021 (TATOLI)–Aldeia tolu (Sacoco, Fohorai boot no Tahu-laran) iha suku Caicoli, postu administrativu Vera Cruz, munisípiu Dili, seidauk simu Cesta Bázika.

Tuir despaisu konjunta ne’ebé fó sai hosi ministériu implementadór, distribuisaun Cesta Bázika estende to’o loron 31 marsu tinan ne’e.

“Iha suku Caicoli, aldeia tolu mak seidauk simu sasán tanba parese ita-nia Ministériu Turizmu Komérsiu no Indústria (MTKI) ho empreza ninia sasán atu distribui mak hotu,” Xefe suku Caicoli, Hipólito Marques Sarmento, informa ba Agência TATOLI, via telefónika, domingu ne’e.

Notísia relevante: Ministériu implementadór asina despaisu estende Cesta Bázika to’o 31 marsu

Maski nune’e, iha segunda (08/03), Xefe suku sei konfirma ba parte kompetente hodi hatene bainhira mak sei halo distribuisaun produtu.

“Ami sei kontinua esforsu halo kontaktu ho fornesedór Cesta Bázika atu aselera distribuisaun,” nia tenik.

Tuir nia, distribuisaun iha suku Caicoli hahú ona iha 26 fevereiru no ramata iha 05 marsu liubá, maibé foin ba aldeia Centro da Unidade no De 12 Divino.

Aldeia aldeia Centro da Unidade iha benefisiáriu hamutuk 1.371 no aldeia De 12 Divino iha 1.100-resin, maibé hosi aldeia rua ne’e iha uma-kain 20 to’o 30 mak seidauk simu tanba sira la marka iha momentu simu produtu.

“Nune’e ami fó oportunidade ba sira ne’ebé mak seidauk hetan direitu ba Cesta Bázika, atu simu iha faze tuir mai bainhira fornesedór iha ona sasan,” nia karesenta.

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina-nuu, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu, produtu ijiene ne’ebé tama lista Cesta Bázika maka hanesan sabaun, álkool jel, deterjente, eskova nehan no pasta nehan.

Jornalista: Osória Marques

Editora: Julia Chatarina

HAKEREK NO HATÁN

Please enter your comment!
Please enter your name here