Diretora Ezekutiva UIF, Maria José Sarmento no Diretora Jerál Autoridade Tributária, Mónica Rangel da Cruz, asina akordu kooperasaun iha salaun MF, Aitarak-laran, sesta (05/03). Imajen TATOLI/António Gonçalves

DILI, 05 marsu 2021 (TATOLI)–Instituisaun tolu ne’ebé hamahan-an iha Ministériu Finansa (MF) hanesan Autoridade Aduaneira (AA)/Alfándega, Autoridade Tributária (AT) no Unidade Informasaun Finanseira (UIF) selebra akordu hodi kombate krime brankeamentu kapitál no finansiamentu terrorizmu iha Timor-Leste.

Protokolu ne’e asina hosi Diretora Ezekutiva UIF, Maria José Sarmento, Diretór Jerál AA, José António Fatíma Abílio, no Diretora Jerál Autoridade Tributária, Mónica Rangel da Cruz.

Ministru Finansa, Rui Augusto Gomes. Imajen TATOLI/António Gonçalves

Ministru Finansa, Rui Augusto Gomes, hateten UIF hanesan instituisaun Estadu ho kompeténsia atu kontrola no iha asesu ba informasaun finanseira tomak hodi prevene no kombate krime brankeamentu kapitál no finansiamentu terrorizmu.

“Protokolu ne’ebé asina hamutuk atu fasilita liña komunikasaun formál ida hodi bele troka informasaun, liuliu informasaun kona-ba atividade relasiona ho prátika ilísitu no kriminál,” Ministru dehan iha salaun MF, Aitarak-laran, sesta ne’e.

Diretora Ezekutiva UIF, Maria José Sarmento no Diretór Jerál AA, José António Fatíma Abílio, asina akordu kooperasaun iha salaun MF, Aitarak-laran, sesta (05/03). Imajen TATOLI/António Gonçalves

Akordu ne’e sei reforsa liután formasaun profisionál no apoiu operasionál entre parte tolu nune’e bele hasa’e efikásia serbisu relasiona ho prevensaun no kombate krime no prátika ilísitu sira.

Instituisaun tolu bele troka informasaun bainhira mosu suspeita ruma

Iha fatin hanesan, Diretora Ezekutiva UIF, Maria José Sarmento, hateten protokolu ne’e permite troka informasaun entre instituisaun tolu bainhira eziste suspeita ruma iha prátika krime brankeamentu kapitál ka krime subjasente sira, hodi bele kontribui di’ak liután ba prosesu prevensaun.

Diretora Ezekutiva UIF, Maria José Sarmento no Diretora Jerál Autoridade Tributária, Mónica Rangel da Cruz, asina akordu kooperasaun iha salaun MF, Aitarak-laran, sesta (05/03). Imajen TATOLI/António Gonçalves

Objetivu selebrasaun protokulu kooperasaun ho autoridade rua ne’e ho misaun atu administra impostu diretu aduaneiru no knaar relevante ne’ebé serbisu hamutuk.

“Autoridade sira ezerse inspesaun tributária hodi prevene, kombate fraude no invezaun fiskál ne’ebé tuir kódigu penál Timor-Leste identifika nu’udar krime subjasente brankeamentu kapitál no finansiamentu terrorizmu,” nia akresenta.

Ho protokolu ne’e bele reforsa liután kooperasaun entre jestaun sira iha nível nasionál, tuir rekomendasaun no rekezitu iha kuadru legál nasionál.

Diretora Ezekutiva UIF, Maria José Sarmento no Diretór Jerál AA, José António Fatíma Abílio, asina akordu kooperasaun iha salaun MF, Aitarak-laran, sesta (05/03). Imajen TATOLI/António Gonçalves

Aleinde ne’e, bele responde ba kestaun balun ne’ebé identifika iha relatóriu avaliasaun nasionál ba risku brankeamentu kapitál no finansiamentu terrorizmu ne’ebé komisaun nasionál ba implementasaun medida hirak ne’e konklui no implementa ona planu  estratéjiku ba metigasaun risku hahú hosi tinan 2016.

“UIF hamutuk ho AA no Autoridade Tributária fó pasu importante ida tan iha área kooperasaun nível nasionál hodi habelar serbisu hamutuk ho instituisaun nasionál hotu, ho objetivu asegura seguransa no estabilidade sistema finanseira no setór ekonomia nasionál,” nia subliña.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here