Vise-Ministru Interiór, António Armindo. Imajen TATOLI/Egas Cristovao

DILI, 04 fevereiru 2021 (TATOLI)-Vise-Ministru Interiór (MI), António Armindo, kinta ne’e, rejeita informasaun hosi mídia balun nia publikasaun katak nia mak orienta polísia halo atuasaun hodi detein Arnaldo Mendes Ribeiro iha Manleuana, Dili.

Bazeia ba publikasaun mídia sira balun katak Arnaldo Mendes Ribeiro nu’udar vítima solda portaun iha tempu loron  ne’ebé hafahe uma entre ninian  ho konselleiru másimu Partidu KHUNTO,  José dos Santos Naimori Bukar iha Manleuana.

Teki-teki de’it, haktuir hosi mídia hirak ne’e hodi sita deklarasaun Arnaldo Mendes Ribeiro katak Vise-MI uza nia autoridade orienta PNTL hodi halo detensaun ba  nia (Arnaldo Mendes Ribeiro-red) iha tempu kalan iha nia rezidénsia la ho mandadu kapturasaun hosi Tribunál.

Vise-MI, António Armindo, klarifika katak informasaun ne’ebé fó sai dehan nia parte mak orienta polísia hodi halo kapturasaun ne’e la loos tanba momentu ne’ebé nia parte hala’o enkontru ho Vise-Primeiru  Ministru, Armanda Berta  no  lider supremu KHUNTO   iha sira-nia rezidénsia.

“Kalan ne’e, ha’u hala’o enkontru ho Vise-PM Armanda Berta ho lider másimu  KHUNTO nian iha sira-nia rezidénsia. Durante enkontru rona membru seguransa ne’ebé fó seguransa ba Vise-PM haksesuk malu no barullu uitoan. Nia haree duni situasaun ne’e no lakleur de’it membru polísia sira to’o iha fatin akontesimentu hodi asegura tiha situasaun hodi evita problema sai boot,”  António Armindo hateten hodi responde jornalista, iha nia kna’ar fatin, Vila Verde, Dili.

António Armindo hateten, momentu ne’ebá nia mós haree Arnaldo Mendes Ribeiro,  diskute-malu ho Korpu Seguransa Pesoál (CSP) ne’ebé fó seguransa ba Vise-PM Armanda Berta. Mézmu nune’e, nia la halo orientasaun ruma atu polísia tenke atua, mas derrepente de’it polísia sira mai atua tiha ona.

Nia rekoñese katak kualkér atuasaun ka detensaun tenke bazeia ba mandadu detensaun hosi Tribunál. Maibé atuasaun polísia nian tempu ne’ebá atu hakalma situasaun de’it.

“Polísia ne’e ba ema hotu-hotu la’ós ba hirak ne’ebé iha kargu de’it, tanba ne’e, papél polísia atu sadi’a ema hotu,”  nia hateten.

Polísia atua bazeia ba informasaun komunidade

Hosi sorin seluk, Komandante PNTL Munisípiu Dili, Superintendente Xefe, Henrique da Costa, hateten atuasaun polísia iha lokál akontesimentu bazeia ba informasaun hosi komunidade tanba dehan iha asaun perturba orden públiku.

Henrique da Costa relata katak iha kalan  02 fevereiru, purvolta tuku 21:00 Otl,  nia simu informasaun hosi sidadaun balun katak mosu problema iha fatin refere,  nune’e orienta kedas polísia patrulla Dom Aleixo, maibé labele atende tanba atende hela kazu seluk ho ida ne’e orienta fila-fali polísia rezerva to’o  ba iha fatin akontesimentu hodi  asegura no saida mak akontese.

Nia rekoñese katak iha investigasaun bolu duni sidadaun na’in-rua ba iha eskuadra Dom Aleixo hodi halo identifikasaun

“Identifika fatin ne’e solda duni no iha evidénsia hanesan mákina solda nian, maibé lakleur depois sira dehan problema ami nian, ami bele rezolve ho nune’e sira fila hafoin ami foti informasaun,” Henrique da Costa tenik.

Hatán kona-ba deskonfia, Vise-MI António Armindo  mak orienta polísia halo detensaun, Henrique da Costa, lia-tun dehan, polísia rona orden hosi Komandante Jerál no buat atuasaun sira ne’ebé lao normál ba ema hotu-hotu, la haree ba pozisaun tanba ne’e sidadaun se de’it sai sente vítima pasa informasaun mai polísia ida ne’e mak sei responde ka asegura tuir lei ne’ebé iha.

“Vítima sira sente asaun polísia nian prejudika sira bele  hato’o keixa ba komandu nune’e bele prosesa,” Henrique da Costa hateten.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here