Diretór Jerál Estatístika, Élias dos Santos Ferreira. Imajen TATOLI/Egas Cristóvão

DILI, 04 marsu 2021 (TATOLI)-Governu liuhosi Diresaun Jerál Estatístika (DGE, sigla portugés) Ministériu Finansa (MF) hahú halo preparasaun atualiza sensus populasaun no uma-kain 2015 iha setembru tinan ne’e.

“Ita halo sensus dahuluk iha tinan 2004, 2010 no 2015, loloos tuir planu ne’e ita halo iha 2020, maibé infelizmente tanba orsamentu laiha, maka ita planeia no muda halo fali iha setembru 2021. Maibé iha futuru sei atualiza kada tinan-lima,” Diretór Jerál Estatístika MF, Élias dos Santos, informa ba Agência TATOLI, iha edifísiu DGE, Caicoli, kinta ne’e.

Ba inisiativa ne’e, DGE hahú estabelese pilotu no programa hotu hahú iha fulan-abríl atubele fasilita liután sensus populasaun no uma-kain 2021.

Programa ne’e sei mantein pergunta ne’ebé uza iha sensus tinan 2015 atubele halo komparasaun ho sensus anteriór, maibé sensus tinan ne’e sei hahú ho relatóriu kada suku hodi fasil halo komparasaun kada tinan-lima.

Maibé iha pergunta sei aumenta buat balun kona-ba ema ho defisiente sira ninia atividade tanba ema hotu agora ko’alia kona-ba kondisaun defisiente fízika sira.

Sei rekruta timor-oan 3.000 halo serbisu

Tuir Diretór ne’e, sei iha rekrutamentu ba timor-oan hamutuk 3.000 atu hala’o serbisu hahú hosi kada suku iha territóriu Timor-Leste.

Orsamentu ba sensus 2021 aprovadu ona iha orsamentu 2021 hamutuk milaun $3, atu selu timor-oan sira ne’ebé sei foti dadus, fó treinamentu, suku farda no disemina informasaun.

Sensus populasaun 2015, ho totál populasaun Timor-Leste hamutuk 1.167.242, kompostu hosi mane 588.561 no feto iha 578.681, enkuantu bazeia ba sensus 2010, rejista populasaun territóriu tomak hamutuk 1.066.409, kompostu hosi mane 544.198 no feto 522.242, ne’ebé hatudu katak durante tinan-lima nian laran populasaun aumenta 100.833.

Jornalista: Florêncio Miranda Ximenes

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here