Empreza Telecomcel, entrega ventiladór rua ho marka CPAP Merk Vent Type Origin 3 ba Ministériu Saúde. Imajen TATOLI/Osória Marques.

DILI, 02 marsu 2021 (TATOLI)—Empreza Telkomcel, ohin, entrega ventiladór rua ho marka CPAP Merk Vent Type Origin 3 ba Governu liuhosi Diretór Nasionál Apoiu Servisu Ospitalár no Emerjénsia, Ministériu Saúde, Nilton da Silva, atu fasilita ema afetadu ba moras COVID-19 iha Timor-Leste.

Manager Entreprise & Whole Sales, Telkomcel, Joana Miranda Pereira, hateten pandemia COVID-19 ne’ebé alastra iha mundu tomak inklui iha Timor-Leste ne’ebé sai responsabilidade ema hotu nian, tanba ne’e mak Empreza Telecomcel hakarak kontribui ventiladór rua ba Jestaun Krize COVID-19 Timor-Leste nian hodi atende ba ema afetadu sira.

“Ami hosi Telkomcel hakarak kontribui no hola parte duni atu oinsá bele kombate ba moras ida-ne’e. Tanba ne’e, ami-nia esforsu durante ne’e, ami konsege hetan ventiladór rua hodi apoiu ba parte ne’ebé mak presiza duni,” Joana Miranda Pereira hateten ba Agência TATOLI bainhira entrega ventiladór rua ba reprezentante Jestaun Krize COVID-19 Timor-Leste, iha edifísiu Ambulánsia, Caicoli, Dili, tersa ne’e.

Joana hateten, ba oin mak Empreza Telkomcel sei oferese tan ba parte relevante ne’ebé mak liga ba pandemia COVID-19 nian iha Timor-Leste.

Iha biban hanesan, Diretór Nasional Apoiu Servisu  Ospitalár  no Emerjénsia, Ministériu Saúde,  Nilton  da Silva, hakarak agradese ba apoiu hosi Empreza Telkomcel ne’ebé mak entrega ventiladór rua ba Governu Timor-Leste.

“Ha’u lori Diretór Jerál nia naran hakarak apresia ba apoiu ne’ebé mak ita-boot sira fó mai ami. Ami la haree ba nia montante maibé ami haree ba kontribuisaun ne’ebé mak ita-boot sira esforsu ona no entrega mai ami,” nia dehan.

Nia dehan, bainhria atu hetan ventiladór ne’e mós presiza halo esforsu lubuk ida mak foin hetan maibé nia fiar katak sasán ne’e sei funsiona ba sira no nia detallu parte téknika sei haree. Maibé, tuir nia, sei bolu mós parte Ospitál Nasionál Guido Valadares (HNGV) atu ninia funsaun loloos ne’e oinsá.

“Ha’u sei bolu parte HNGV atu haree nia funsaun ne’e atu uza oinsá no ita sei teste tan. Tanba ventiladór ne’e atu uza ba COVID-19 ka oinsá. Maibé, karik COVID-19 laiha ba mós ita sei uza ba kontrola ita-nia sistema,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here