Primeiru-Ministru, Taur Matan Ruak hamutuk ho membru Governu no Sala Situasaun CIGC, diskute pedidu renovasaun deklarasaun EE ba dala-11 hosi Prezidente Repúblika, iha sala plenária PN, segunda (01/03). Imajen TATOLI/Egas Cristóvão

DILI, 01 marsu 2021 (TATOLI)–Xefe Estadu Maiór Koordenadór Sala Situasaun Sentru Integradu Jestaun Krize (CIGC, sigla portugés), Komodoro Donaciano do Rosário da Costa Gomes ‘Pedro Klamar Fuik’, deklara prevensaun surtu COVID-19 iha Timor-Leste la’ós ona iha senáriu otimista tanba eziste ona transmisaun lokál iha munisípiu Covalima.

Koordenadór Sala Situasaun ko’alia lia hirak ne’e, relasiona ho infraestrutura hanesan rekursu atribuidu hosi departamentu reasaun rápida hodi halo artikulasaun traballu ho forsa-tarefa prevensaun no metigasaun surtu hosi bele kria, koordena, no identifika rekursu hotu ne’ebé mak eziste hodi prepara tuir estudu ne’ebé maka estabelese iha tinan kotuk kona-ba senáriu sira.

“Senáriu otimista katak jero ou laiha kazu, realidade agora ne’e la’ós ona otimista maibé otimista moderada ne’ebé konta 1% hosi totál populasaun karik iha 3.000 infetadu, kazu lijeiru bele aumenta to’o 5.000, kazu moderadu 5.000 ou konstitui 40%, enkuantu kazu grave karik konstitui 15%, ne’ebé signifika iha ona 1.950,” Xefe Estadu Maiór hateten iha debate estensaun Estadu Emerjénsia (EE) da-11 iha Parlamentu Nasionál (PN), segunda ne’e.

Nia esplika, karik iha kontájiu 1% pozitivu, signifika presiza iha sala izolamentu 1.950 no iha kuidadu intensivu, maibé bainhira iha kazu grave ba sistema respiratóriu maka konstitui 5% hosi 1%, ho totál populasaun hamutuk 650.

“Ida-ne’e bele hatene mós kuantidade óbitu (mate), sé iha 3% hosi 1% konstitui 390 óbitu, maibé felizmente seidauk iha mak mate,” nia akresenta.

Enkuantu, daudaun ne’e fasilidade kuarentena públiku ne’ebé eziste hamutuk kuartu 362, iha kuarentena privadu ou fatin ne’ebé maka Governu aluga hamutuk kuartu 334  ou totál disponível kuartu ne’ebé eziste 728, maibé disponível maka 472.

Kama disponível ba kazu lijeiru no kazu grave, katak ba kuidadu intensivu iha kama 25 to’o 45, kazu lijeiru iha fatin izolamentu, iha kama 120 ne’ebé bele mós iha posibilidade sa’e to’o kama 205 bainhira konta mós ho klínika no ospitál ne’ebé eziste.

Kona-ba óbitu, presiza iha Metinaro, Maliana, Covalima no Rejiaun Administrativa Espesiál Oé-cusse Ambeno (RAEOA) no presiza kaixaun tanba taxa 3% hosi 1% kazu kontájiu, hosi totál populasaun no kada munisípiu inkluzivamente RAEOA presiza ambulánsia própria.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here