Primeiru-Ministru, Taur Matan Ruak hamutuk ho membru Governu no Sala Situasaun CIGC, diskute pedidu renovasaun deklarasaun EE ba dala-11 hosi Prezidente Repúblika, iha sala plenária PN, segunda (01/03). Imajen TATOLI/Egas Cristóvão

DILI, 01 marsu 2021 (TATOLI)-Primeiru Ministru (PM), Taur Matan Ruak, kontinua enkoraja sidadaun tomak atu hamutuk luta kontra surtu COVID-19, nune’e populasaun labele mate ba pandemia globál ne’e.

“Ita-nia istória hatudu katak bainhira ita hamutuk, moras sira bele ultrapasa lais no rápidu liu. Ha’u fiar katak ita lakohi mate, tanba ne’e ita tenke esforsu doubru hodi hamutuk ho fuan no hateten katak COVID-19 labele hamate ita-nia sidadaun,” PM Taur hateten iha debate estesaun Estadu Emerjénsia (EE) ba dala-11, iha sala plenária Parlamentu Nasionál (PN), segunda ne’e.

Tuir Xefe Ezekutivu, Governu daudaun esforsu atu halo ekuilibriu entre kombate COVID-19 no proteje ekonomia rai-laran.

Nune’e, Governu hahú implementa programa rekuperasaun ekonómika, hanesan Cesta Bázika, subsídiu ba família, apoiu ba empreza no seluk tan.

“Nasaun tomak esforsu atu evita másimu posível sakrifísiu sidadaun sira, enkuantu aprezentasaun própriu Sala Situasaun Sentru Integradu Jestaun Krize (CIGC, sigla portugés) hateten katak iha nesesidade atu kontinua akordaun sanitária iha munisípiu Covalima, maibé ita bele retira iha munisípiu Bobonaro,” nia akresenta.

Iha sorin seluk Sala Situasaun CIGC kontinua tau atensaun másimu ba evolusaun situasaun kada momentu ne’ebé dezenvolve atu kria medida apropriadu.

Xefe Governu nota katak, presiza loke korridór ida ba estudante munisípiu Covalima ne’ebé iha Dili no nesesidade bázika bele bá-mai.

Governu mós loke fronteira terrestre Batugade ba kada loron 15, hodi iha fleksibilidade ba sasán no ema.

PM Taur konsidera, bainhira sasán la mai maka afeta ba kapasidade komunidade atu sosa laiha no bele kria problema ba família sira-nia ekonomia.

“Ita halo jestaun ba kestaun ne’e ho kuidadu  tebes no kontinua esforsu atu labele iha ema mate iha Timor-Leste. Situasaun ne’e akontese iha mundu ne’ebé nia risku boot no bala-barak evolui ho ninian evolusaun rasik, enkuantu ita ema halo posível atu evita, maibé atu impede totálmente própriu evolusaun la’ós fásil,” Xefe Governu rekoñese.

Nune’e, Governu mós esforsu maka’as atu hein fulan-ida ka rua tan, bele asesu ba vasinasaun hodi realiza planu nasionál vasinasaun ba sidadaun.

“Ami husu deputadu sira-nia apoiu nafatin, atu ita bele halo esforsu boot iha fulan-rua nia laran, antes ita-nia nasaun hetan vasina,” nia hatutan.

Alende ne’e, Timor-Leste mós adere ona ba sistema COVAX Facility, ne’ebé  Governu husu ona atu komisaun liña ministeriál halo planu roteiru vasina COVID-19 iha Timor-Leste ne’ebe sei aprezenta ba Konsellu Ministru.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here