Arsebipu Arkidioseze Metropolitana Dili, Don Virgílio do Carmo da Silva, kuda Ai-kasi iha Jardin Motael, Dili. Imajen TATOLI/Arminda Fonseca.

DILI, 26 fevereiru 2021 (TATOLI)–Arsebipu Arkidioseze Metropolitana Dili, Don Virgílio do Carmo da Silva, ohin, hamutuk ho estudante Universidade Nasionál Timor-Leste, Universidade da Paz, grupu U-40, no Polísia Nasionál Timor-Leste (PNTL) kuda Ai-kasi hun 100 iha Jardin Motael Dili.

Don Virgílio hatutan, objetivu hosi kuda ai-oan ne’e liuliu kuda Ai-kasi oan ne’e hakarak halo Dili sai matak bainhira iha tempu bailoron naruk.

Arsebipu Arkidioseze Metropolitana Dili, Don Virgílio do Carmo da Silva, kuda no rega Ai-kasi iha Jardin Motael, Dili. Imajen TATOLI/Arminda Fonseca.

“Kuda Ai-kasi-oan tanba ita hotu hatene katak ita-nia rai ho mudansa klimátika ne’ebé ita hotu haree katak tempu bailoron hahú juñu ba oin ne’e rai maran. Tanba ne’e, liuhosi kuda ai-oan nune’e to’o tempu bailoron naruk karik nia bele halo Dili matak. Ita presiza servisu makaas atu promove ai-oan sira liuliu Ai-kasi tanba Ai-kasi nu’udár orijén Timor nian,” Don Virgílio hateten  iha nia diskursu bainhira halo abertura ba kudu ai-oan iha Jardin Motael, Dili, sesta ne’e.

Tanba ne’e, nia konsidera inisiativa ne’ebé estudante hosi Universidade sira no ekipa U-40 halo hodi kuda ai-oan iha Dili laran ne’e inisiativa ida furak tebes. 

“Tanba ita-nia estudante sira mak nu’udár futuru ba rai ida-ne’e, ne’eduni ita-nia partisipasaun ohin kuda ai-oan ne’e kapaas tebes atu kontribui oinsá bele enkoraja komunidade hotu atu bele kuda ai-oan,” nia dehan.

Nia hateten, kada tinan iha grupu oioin ne’ebé sempre kuda ai-oan no buat ne’ebé importante liu mak la’os kuda de’it maibé oinsá  mak atu mantein kuidadu ai-oan sira ne’e atu moris, tanba dala barak kuda hotu tiha ne’e abandona de’it no la kuida ida.

“Ha’u hakarak, ohin, ita iha ne’e ha’u sadik ita-nia obrigasaun la’os atu kuda de’it maibé oinsá ita proteje ai-oan ne’ebé ita kuda ne’e, liuliu iha tempu ne’ebé difísil iha bai loron oinsá mak atu ema labele estraga no animál labele estraga ida-ne’e mós sai prekupasaun bai ta hotu nian,” nia subliña.

Don Virgílio dehan, hakarak atu haburas sidade ne’e elementu ida ne’ebe esensiál hanesan hotu-hotu responsável ba rai ida-ne’e presiza mós la’os  mak kuda maibé oinsá promove kona-ba limpeza.

“Tanba ne’e Apela ba timoroan hotu-hotu ne’ebé hela iha Dili, atu ita hotu ne’ebé hela iha Dili, hakaas-aan atu família ida kuda ai-kasi hun ida iha uma hun ka toos laran. Bainhira kuda iha uma hun ka toos laran, nia sei tau matan ba buat ne’ebé nia kuda,” Don Virgílio hateten.

Tanba, nia dehan, liuhosi kuda kasi-oan mak ninia  vantajen ne’ebé di’ak liután hodi haburas sidade Dili, tanba ne’e husu ba ema hotu-hotu nia responsabilidade hodi tau matan.

Jornalsita: Arminda Fonseca

Editór: Cancio Ximnes

HAKEREK NO HATÁN

Please enter your comment!
Please enter your name here