Asaun foti ema-nia telemovél hosi motór nia dashboard. Imajen/Google

DILI, 26 fevereiru 2021 (TATOLI)-Dezde Timor-Leste restaura nia  independénsia, 20 maiu 2002, autoridade seguransa Munisípiu Dili tempu ne’ebá kuaze la rejista kazu asalta ema iha dalan hodi foti ema nia sasán hosi ema-nia liman-laran. Ironia, iha semana ne’e, Polísia Nasionál Timor-Leste (PNTL) Munisípiu Dili rejista ona kazu ho tipu hadau ema nia sasán.

Komandante Tránzitu Munisípiu Dili, Inspetór Domingos Sarmento Gama, informa, kazu asalta para foti ema nia sasán hosi ema nia liman-laran iha kapitál Dili daudaun númeru sa’e maka’as.

Domingos Sarmento Gama, hateten iha tersa (23/02), akontese kazu asalta foti ema nia sasán  iha fatin tolu ka haat hanesan iha area Rotunda Elemloi, Delta, ne’ebé daudaun ne’e  vítima ida hala’o tratamentu  iha Ospitál Nasionál Guido Valadares (HNGV).

“Kazu asaltu ne’e akontese  kriminozu sira  hadau ema nia sasán hanesan telemovél,” Komandante Tránzitu Munisípiu Dili, Inspetór Domingos Sarmento Gama hateten ba jornalista sira iha Komandu PNTL Munisípiu, Dili, sesta ne’e.

Iha kazu asaltu ne’e, Inspetór Domingos Gama, esplika vítima ida kondús hela motór no rai nia telemovél iha motór nia dashboard. Derrepente, iha ema na’in-rua ho mós motór halai besik ba vítima hodi lolo-liman ba foti telemovel, maibé vítima salva lalais kedas.

Mezmu kriminozu la konsege foti vítima nia telemovél, maibé kriminozu ida tuur iha motór kotuk konsege tebe-monu vítima hosi motór leten hodi rezulta vítima kanek no evakua ba halo tratamentu iha HNGV.

Polísia buka tuir hela kriminozu sira, maibé sei identifika hela tanba bainhira kriminozu sira uza motór halo asaltu sira-nia motór la uza xapa matrikula hodi difikulta ema halo identifikasaun.

“Akontesimentu ne’e la’ós hasoru ba sidadaun lokál de’it, maibé ba mós ema estranjeiru tanba ne’e kriminozu sira-ne’e mosu iha fatin-fatin ho organizadu,” hateten Domingos Gama.

Komandu PNTL Munisípiu Dili orienta  ona ba parte Seguransa Rodoviáriu Tránzitu atu halo operasaun espesiál ba sidadaun ne’ebé maka  uza transporte liu-liu motorizada la uza xapa matrikula.

Ba motorizada no karreta ne’ebé la tau xapa matrikula kontra lei kódigu  ka kontra dekretu lei númeru 6/2003.

“Hahú horikalan ita halo operasaun kuaze komesa konsege foti motoriza lubuk ne’ebé la uza xapa matrikula,” Domingos Sarmento Gama tenik.

Nia  apela ba komunidade hotu atu la’o ho kuidadu no atensaun ho ema kriminozu  sira ne’ebé daudaun ne’e movimentu iha sosiedade hodi hadau ema-nia sasán.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here