Asesibilidade iha fatin públiku. Imajen/Escolavirtual

DILI, 26 fevereiru 2021 (TATOLI)—Ministériu Obra Públika (MOP) antes ne’e hasai ona despaisu ministeriál númeru 7/MOP/VIII/2020, kona-ba kondisiona mobilidade ba asesibilidade sidadadaun iha edifikasaun públika no komersiál, tanba ne’e orienta ba oin, kualker konstrusaun públiku no privada foun tenke akomoda asesibilidade ba ema hotu.

Tuir Ministru Obra Públika, Salvador Eugênio Soares dos Reis Pires, despaisu ne’ebé publika ona iha Jornál Repúblika ne’e fó ona instrusaun ba parte hotu, bainhira halo investimentu iha edifísiu públiku no komersiál tenke inklui asesibilidade ba ema ho defisiénsia fízika.

“Ita-nia despaisu ministériu ne’e la re-troativa maibé ba oin, signifika katak kualker edifísiu foun ka investimentu foun ne’ebé halo agora no ba oin presiza haree asesibilidade ba ema ho defisiénsia sira,” Ministru Salvador hateten ba Agência TATOLI, iha Palásiu Governu, sesta ne’e.

Ministru hato’o kestaun ne’e, relasiona ho selebrasaun loron mundiál ba Justisa Sosiál iha loron 20 fevereiru.

Iha biban ne’e, governante ne’e rekoñese daudaun edifísiu barak maka laiha fasilidade atu garante movimentasaun ema ho defisiénsia fizíka.

“Ita haree duni edifísiu públiku no privadu seidauk iha asesibilidade, liuliu edifísiu tuan sira, maibé kuandu iha renovasaun ruma tenke akomoda tuir despaisu ministeriál ne’ebé hasai ona,” nia akresenta.

Maski nune’e, nia konsidera presiza dekretu-lei própriu ida hanesan Planu Ordenamentu atu bele obriga investimentu ba edifísiu públiku no privadu sira bele garante fasilidade inkluzivu.

“Dekretu-lei ne’e ita deriva obigatóriu ba investidór sira, nune’e kada edifísiu tantu públiku no privadu tenke iha duni komponente sira hanesan fasilita movimentu ba ema ho defisiénsia atu ita-nia dezenvolvimentu inklusivu ba ema hotu no parte interesadu sira iha espasu urbanu,” nia hatutan.

Iha futuru, kualker investimentu ba edifísiu públiku no komersiál hotu tenke hetan sertifikasaun hosi MOP liuhosi Diresaun Nasionál Sertifikasaun no bainhira haree ba dezeñu tenke iha asesibilidade ba ema ho defisiénsia fízika.

MOP no Ministériu Planu Ordenamentu (MPO) hahú ona halo diskusaun kona-ba abitasaun urbanizasaun no edifikasaun liuliu ezbosu konstrusaun sivíl, kódigu edifísiu no padraun abitasaun, ne’ebé lejizlasaun ne’e mensiona kona-ba asesibilidade ba ema hotu.

“Iha ezbosu tolu ne’e asegura katak la’ós setór públiku de’it,  maibé komunidade hotu iha país laran bainhira halo edifísiu ruma, obrigátoriu tenke sensível ba ema ho defisiénsia fízika,” Ministru subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here