Saku plástiku ne’ebé prodús hosi kompañia Handy Plastic. Imajen TATOLI/António Gonçalves

DILI, 24 fevereiru 2021 (TATOLI)–Sekretaria Estadu Ambiente (SEA) no Autoridade Aduaneira (AA)/Alfándega sei koopera atu proibe importasaun embalajen uzu úniku sira mai Timor-Leste.

Objetivu kooperasaun ne’e, atu implementa Dekretu-lei ne’ebé promulga ona hosi Prezidente Repúblika, Francisco Guterres ‘Lú Olo’ iha loron 23 setembru 2020 kona-ba eliminasaun no importasaun saku plástiku, uzu úniku, embalajen no objetu hosi materiál plástiku, ne’ebé vigora iha loron 23 janeiru 2021.

“Ita komunika ona ho Autoridade Aduaneira atu lista sira ne’ebé tama alvu atu face out, liuliu embalajen uzu úniku no fatin falun hahan sira, bele proibe importasaun mai iha Timor-Leste,” Sekretáriu Estadu Ambiente, Demétrio do Amaral de Carvalho, informa ba Agência TATOLI, foin lalais ne’e, iha ninia knaar fatin, Bebora.

Aleinde ne’e, SEA mós koopera ona ho Ministériu Koordenadór Asuntu Ekonómiku (MKAE) atu halo diploma ministeriál ida hodi envolve ajénsia sira hanesan Autoridade Inspesaun no Fiskalizasaun Atividade Ekonómika, Sanitária no Alimentasaun (AIFAESA) no TrandeInvest.

“Ita hakarak AIFAESA halo kontrolu implementasaun dekretu-lei ne’e liuliu iha loja sira no TrandeInveste haree ba investimentu ne’ebé tama mai, bazeia dekretu-lei bandu hanesan fábrika embalajen uzu úniku sira,” nia esplika.

Governu mós proibe atu importa no notifika totál estabelesimentu fábrika produsaun embalajen uzu úniku sira iha Timor-Leste.

Dekretu-lei ne’ebé estabelese, bandu halo alienasaun, importasaun no produsaun produtu plástiku naun resiklável no halo akizisaun, distribuisaun, importasaun no produsaun ba objetu plástiku.

Diploma ne’e mensiona atu estabelese prinsípiu fundamentál hirak hanesan prekausaun, prevensaun, dezenvolvimentu sustentável, seguransa ambientál globál, poluidór-pagadór, reutilizasaun no resiklajen no valorizasaun enerjétika.

Bele prevene no hamenus impaktu rezíduu iha ambiente no haree kle’an liu prinsipalmente ba produtu plástiku sira ne’ebé la’ós resiklável hodi prevene no bandu atu fa’an inklui importasaun objetu plástiku.

Re-utilizasaun resiklajen no eliminasaun saku plástiku uzu úniku relasiona ho alternativu sira ne’ebé maka atu halo saku plástiku hosi ai-farina, ne’ebé empreza balun hahú prodúz ona maibé alternativa seluk hakarak atu enkoraja empreza kiik sira hodi bele prodúz matéria orgánika hanesan kohe, bote, no saku ne’ebé bele halo ho matéria orgánika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here