Kondisaun atuál Edukasaun Pré-Eskolár Baura. Imajen/Profesora Elisa Correia de Fátima.

DILI, 24 fevereiru 2021 (TATOLI)—Udan no anin boot ne’ebé akontese iha domingu loron 21 fulan ne’e, sobu edifísiu Edukasaun Pré-Eskolár (EPE) públiku iha aldeia Baura, suku Leorema, Postu Administrativu Bazartete, Munisípiu Liquiçá.

Profesora Elisa Correia de Fátima, hateten edifísiu ekola ne’e rasik konstrui iha laletek ida ho sala-de-aula tolu ne’ebé estudante sira uza sala-rua ba prosesu aprendizazen, no ida seluk profesór sira mak uza.

“Sala ba profesór-sira mak hetan estragus makaas tanba kalén naksobu totál. Ami-nia prosesu aprendizazen la’o nafatin tanba anin mós para ona,” Profesora Elisa Correia de Fátima informa ba jornalista Agência Tatoli via telefónika, kuarta ne’e.

Nune’e mós Diretór Serbisu Edukasaun Munisípiu Liquiçá, Zeto António, hateten edifísiu Edukasaun Pré-Eskolár ne’ebé foin konstrui iha tinan kotuk hosi Planu Nasionál Dezenvolvimnetu Suku (PNDS), ladún estratéziku tanba iha loos laletek ne’ebé risku boot ba dezatre naturál.

“Ami haree kondisaun edifísiu ne’e iha risku bo’ot. Tanba kalen naksobu totál. Ita la garante labarik-sira atu kontinua sira-nia atividade aprendizazen,” Zeto António hateten via telefónika.

Nia mós sei haree atu hapara lai atividade eskolár tanba la garante seguransa ba alunu sira-nia vida.

Parte Serbisu Edukasaun Munisipál mós rekolla ona dadus hosi dezastre naturál ne’e no submete ona relatóriu ba Ministériu Edukasaun Joventude no Desportu liuhosi Diresaun Nasionál Asaun Sosiál Eskolár (DNASE) atu bele foti medida-ruma.

Kona-bá ne’e, Diretór Nasionál Asaun Sosiál Eskolár, Joaquim Martins hateten sei halo konfirmasaun ho parte PNDS ne’ebé sai responsável másimu ba projetu eskola ne’e.

Hafoin akontesimentu iha semana kotuk, Komisaun E ne’ebé trata Asuntu Edukasaun  iha Parlamentu Nasionál (PN) halo ona fiskalizasaun ba fatin akontesimentu.

Atualmente iha estudante na’in 55 mak hala’o estudu iha Edukasaun Pré-Eskolár Baura no iha profesór kontratadu na’in-tolu.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here