Ilustrasaun vítima konstrusaun edifísiu. Imajen/Antara

DILI, 23 fevereiru 2021 (TATOLI)–Traballadór ida ho naran Raimundo hosi munisípiu Lautém, monu tun hosi andar lima no hakotu iis iha fatin, durante serbisu konstrusaun iha loja Star King, Audian, iha segunda (22/02), iha tuku 14:30.

Tuir sasin, ne’ebé hanesan traballadór Star King, Felix de Deus, traballadór Raimundo hetan dezastre ne’e bainhira nia halo serbisu silu besi.

“Ami ho vítima ne’e mak halo hela serbisu, maibé bainhira nia sa’e ba andar lima atu silu besi maka derrepente ami rona buat ida hanesan monu tun, entaun ami halai no haree kolega ne’e mak monu,” Traballadór Felix hateten ba Agência TATOLI, iha ninia knaar fatin, Star King, Audian, tersa ne’e.

Sasin ne’e dehan, bainhira akontesimentu, vítima iha andar lima enkuantu ninia kolega seluk iha andar seluk.

“Iha kontrusaun ne’e rasik, ida-idak foku ba ninia serbisu tanba ne’e ladún hatene kronoljia akontesimentu, tanba kolega vítima ne’e rasik ho kolega sidadaun Indonézia ida maka iha leten liu, enkuantu ami iha kraik, kuandu akontese maka ami halai ba haree vítima monu la ho ekipamentu serbisu,” nia akresenta.

Traballadór Felix haktuir, vítima serbisu kleur ona desde hahú kontrusaun, tanba ne’e sente triste.

“Nia serbisu kleur ona desde konstrusaun halo, ami nu’udar kolega sente triste tanba lakon kolega di’ak hanesan vítima no ohin ami deside para oituan ho serbisu,” nia hatutan.

Entertantu iha lokál akontesimentu, Polísia Nasionál Timor-Leste (PNTL) dada ona liña no lori kedan mate-isin bá Hospital Nacional Guido Valadares (HNGV).

Enkuantu, Polísia Sientífika Investigasaun Kriminál lori kedan sasin balun hodi presta deklasaun iha PNTL Caicoli relasiona ho akontesimentu ne’e. 

To’o notísia ne’e publika, Agência TATOLI seidauk hetan konfirmasaun hosi parte kompañia Star King relasiona ho seguransa serbisu ba traballadór sira bainhira hala’o hela knaar iha terrenu.

Jornalista: Natalino Costa

Editora: Julia Chatarina

PUBLISIDADEiklan

1 KOMENTÁRIU

  1. Obrigadu Wain boot Ba Informasaun nebe fo sai husi Agensia Tatoli nee hodi bele konese klean Liu Kona situasaun iha Rai laran.

    Foin mk asesu Dala uluk Mai iha website Ida nee🙏💪💪🇹🇱🇹🇱

HAKEREK NO HATÁN

Please enter your comment!
Please enter your name here