Pouzada Tutuala. Imajen Tatoli/Dok.

DILI, 23 fevereiru 2021 (TATOLI)-Ministru Justisa (MJ), Manuel Cárceres da Costa, tersa ne’e, iha edifísiu Ministériu Justisa Caicoli, Dili, simu audiénsia ho Ministru Turizmu Komérsiu no Indústria (MTCI), José Lucas do Carmo da Silva, akompaña hosi Vise-Ministru Komérsiu no Indústria, Domingos Lopes Antunes, hodi ko’alia kona-ba   kontratu arrendamentu ba pouzada sira ne’ebé  antes ne’e MTCI mak  jere.

Tuir polítika MTCI daudaun ne’e sei entrega fali ba iha  Ministériu Justisa. Nune’e, liuhosi sorumutuk ne’e MTCI aprezenta ba Ministériu Justisa iha pouzada lima kompostu hosi Hatubelico, Maubessi, Ataúro, Tutuala ho Maubara ne’ebé daudaun ne’e Timor-oan sira mak jere hodi hala’o atividade ekonomia,  oinsá mak MJ  atu bele estabelese fila-fali kontratu arrendamentu.

Ministru Justisa, Manuel Cárceres da Costa. Imajen Tatoli/Egas Cristovão

“Ha’u husu MTCI atu kanaliza baze legál kontratu sira ne’ebé antes ne’e iha  ba iha Ministériu Justisa  hodi haree sei regulariza tuir kontratu arrendamentu,” Ministru Justisa, Manuel Cárceres da Costa, hateten ba Agência Tatoli hafoin remata enkontru.

Parte sira diskute mós  kona-ba restaurante sira ne’ebé lokaliza besik  iha area  tasi-ibun  ne’ebé antes ne’e MTCI mak estabelese kontratu arrendamentu ba oin sei entrega ba iha MJ.

MJ husu MTCI atu rekolla lista pouzada sira ne’ebé utiliza iha territóriu ho fatin restaurante  hodi fornese ba MJ atu bele ba oin sei jere nu’udar bens  movel  Estadu nian.

Antes ne’e mós Ministru MTCI halo ona vizita ba fatin pouzada balun no tuir planu sei reabilita fatin pouzada sira ne’ebé identifika ho kondisaun infraestrutura ladún di’ak no parte ida atu dezenvolve sai fatin turizmu hodi bele rekolla tan reseita ba kofre Estadu.

Jornalista   : Nelson de Sousa

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here