Eis Prezidente Repúblika, José Manuel Ramos Horta sai oradór prinsipál ba Orientasaun Estudante foun tinan akadémiku 2021, iha Salaun José Casimeiro Universidade da Páz (23/02). Imajen/Média UNPAZ.

DILI, 23 fevereiru 2021 (TATOLI)—Eis Prezidente Repúblika, José Manuel Ramos Horta sujere ba Governu atu aloka orsamentu espesiál hosi Orsamentu Jerál Estadu (OJE) kada tinan, nune’e bele garante kualidade Ensinu Báziku to’o Ensinu Superiór iha Timor-Leste (TL).  

José Ramos Horta hato’o sujestaun ne’e tanba konsidera Governu iha ona esperiénsia hodi aloka orsamentu espesiál ba Conferênsia Episcopál Timorense (CET) no mós ba konfisaun relijioza-sira hosi OJE kada tinan.

Notísia Relevante:PN aprova osan ba MEJD ho montante millaun $111-resin

“Ha’u sujere atu Governu tau mós orsamentu espesiál ba área edukasaun,” Horta ko’alia ba jornalista-sira, hafoin sai oradór iha orientasaun estudante foun Universidade da Páz (UNPAZ), tersa ne’e.

Eis titulár ne’e sujere liu tan katak, bainhira Governu iha duni planu atu tau orsamentu espesiál ba área edukasaun, tenki konsentra ba área prinsipál ne’ebé  konsidera importante liu.

Área prinsipál ne’e mak hanesan, aloka direta ba administrasaun universidade públiku no privadu sira, nune’e  bele hadi’a sira-nia vensimentu, kompleta fasilidade no bele halo mós rekrutamentu ba dosente-sira ne’ebé iha kualidade.

Horta sente triste tanba to’o oras ne’e seidauk haree hetan polítika Governu-nian ba asuntu ne’e, maibé haree hetan mak deputadu no polítiku-sira mak iha osan barak.

“Bainhira Governu la tau prioridade hodi investe ba área ne’ebé mensiona, sei lori dezastre ba jerasaun foun iha futuru tanba ema matenek laiha,” Horta subliña.

Entretantu, Orsamentu Jerál Estadu (OJE) tinan 2021 ne’ebé Governu prevee ba Ministériu Edukasaun Joventude no Desportu (MEJD) hamutuk $111.478.459, Ministériu Ensinu Superiór Siénsia no Kultura (MESSK) hamutuk $6.320.415.

Jornalista: Tomé Amado

Editór: Ciprianno Colo

PUBLISIDADEiklan

HAKEREK NO HATÁN

Please enter your comment!
Please enter your name here