Koordenadór Gabinete Apoiu Sosiedade Civil (GASC), Filipe da Costa. Imajen Tatoli/Osória Marques.

DILI, 22 fevereiru 2021 (TATOLI)—Koordenadór Gabinete Apoiu Sosiedade Civil (GASC), Filipe da Costa, hateten presiza setór hotu-hotu nia kontribuisaun atu ema hotu bele adere hodi partilla informasaun kona-ba oinsá atu hadi’a mánutrisaun iha Timor-Leste.

“Ita presiza setór hotu nia kontribuisaun hodi hadi’a mánutrisaun iha ita-nia rain,” Filipe da Costa hateten ba jornalista sira iha salaun FONGTIL, Caicoli, Dili, segunda ne’e.

Nia hatutan, iha setembru tinan kotuk ne’e VIII Governu Konstituisionál adere ba global ida-ne’ebé ho naran Movimentu Estimulasaun Nutrisaun (SUN Movement), tanba ne’e presiza fahe informasaun. Movimentu ida-ne’e maske Governu mak lidera maibé la’ós Governu mesak mak implementa. 

Tuir nia, Governu esforsu lidera liuhosi setór sira iha kada nasaun ida nia-laran no identifika pontu fokál SUN Movement nian.

Nia dehan, Timor-Leste tama ba Movimentu Estimulasaun Nutrisaun ba membru 62 nian iha mundu, hanesan membru iha responsabilidade atu bele atinje Objetivu SUN Movemnent SUN nian, tanba ne’e parte hotu nia kontribuisaun no partisipasaun ne’e importante.

Filipe hatutan, presiza setór barak tanba evidénsia globál rekoñese katak mánutrisaun iha kauza barak entaun presiza ema atu servisu hamutuk hodi tau nutrisaun ba iha esforsu dezenvolvimentu hotu-hotu no implementa solusaun sustentável hirak ne’ebé mak la’o di’ak.

Tanba, nia dehan, SUN Movement iha apoiu hosi nasaun 100-resin ne’ebé atu foka hodi apoiu nasaun sira hodi hakotu mánutrisaun iha ninia forma hotu no alkansa alvu Obejetivu Dezenvolvimentu Sustentável (ODS2) to’o 2030. 

“Ita iha esfrosu lubuk ida dezde Governu dahuluk nian to’o ohin loron. Ita konsege halo esbozu estratejia sira kona-ba oinsá halokon hamlaha no hadi’a mánutrisaun iha ita-nia rain. No, oinsá mak bele asegura para ai-han hotu-hotu bele seguru iha fatin hotu-hotu,” nia dehan.

Filipe hateten, presiza iha planu asaun multisektorál ida, atu nune’e implementa estratejia sira-ne’ebé halo tiha ona. Tanba, presaun hosi GASC mak to’o 2030 tenke atinje ai-han seguru no nutrisaun di’ak tuir planu estratejia dezenvolvimentu nasionál no ODS2.

Bainhira to’o iha ne’ebá, nia hateten, Timor-Leste presiza iha planu asaun ida ho konkreta, klara no reprezentativu ema hotu-hotu nia esforsu, entaun planu hirak ne’e bele liga ba sosiedade sivil nia papél. 

Nia reforsa tan, ba asuntu ohin nian sai hanesan pontu informasaun ida importante hodi aumenta, nune’e, sosiedade sivil sira bele haree no kontribui.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here