Teste amostra ba COVID-19. Imajen/Espesiál

DILI, 22 fevereiru 2021 (TATOLI)—Desde fulan outubru 2020 to’o janeiru 2021, Laboratóriu Nasionál Saúde (LABNAS) rekolla ona rihun $100-resin hosi teste COVID-19 ba Timoroan no ema estranjeiru ne’ebé presiza hetan sertifikadu livre hosi virus ne’e.

“Tarefa ba teste ne’e ekipa laboratóriu halo la hanesan. Ezemplu, teste Polymerase Chain Reaction (PCR) ho kustu $35 ne’ebé presija tempu loron-tolu mak bele foti rezultadu,” Diretora Ezekutiva Laboratóriu Nasionál Saúde, Endang Soares informa ba jornalista Agência Tatoli iha Bidau, segunda ne’e.

Tarefa seluk maka Rapid ka GeneXpert no AustDiagnostic ho kustu $40  ne’ebé presija hein oras 24 to’o 48 mak bele foti rezultadu.

Iha mós tarefa ne’ebé fó de’it prioridade ba kazu urjente mak hanesan teste PCR biofire ho durasaun tempu presija oras 24 ho presu $120.

“Osan hirak-ne’e Laboratóriu Nasionál Saúde la uza, maibé tau iha kofre Estadu,’’  Endang soares sublinña.

Osan hirak-ne’e LABNAS rekolla bazeia ba diploma ministeriál konjunta ho númeru 34/MF no MS/09/2020, 7 outubru ba tarefa teste diagnóstiku surtu COVID-19 ne’ebé publika iha Jornál Repúblika.

Konteúdu hosi diploma ministeriál ne’e mak determina kustu sertifikasaun livre hosi COVID-19 ba Timoroan no ema estranjeiru ne’ebé hakarak halo viajen ba rai-liur.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here