JICA fó treinamentu ba funsionáriu ANATL,E.P kona-ba dezenvolviementu no manutesaun ba aeroportu. Imajen TATOLI/Florêncio Miranda Ximenes

DILI, 22 fevereiru 2021 (TATOLI)-Ajénsia Kooperasaun Internasionál Japaun (JICA, siglá inglés) iha Timor-Leste lansa treinamentu online kona-ba dezenvolvimentu no manutensaun aeroportu ba funsionáriu hosi Aeroportu no Navegasaun Aérea Timor-Leste, Empreza Públika ( ANATL,EP) hamutuk ema na’in 12.

Treinamentu ne’ebé realiza iha otél Golgota sei hala’o durante loron lima nia-laran, hahú loron 22 – 26 fulan ne’e ho matéria dezenvolvimentu infraestrutura aeroportu.

“Antes ne’e, treinamentu hala’o iha Indonézia liuhosi kooperasaun ho ministériu transporte Indonézia. Maibé, dezde tinan ne’e, JICA labele haruka partisipante sira hodi ba tuir direta treinamentu iha Indonézia tanba pandemia COVID- 19. Ne’e duni ami realiza de’it liuhosi online no ministériu transporte Indonézia rasik mak sei fasilita treinamentu refere”, hatete Xefe Reprezentativu JICA iha Timor-Leste, Goto Ko, iha salaun otél Golgota.

Biban hanesan, Prezidente ANATL, E.P, José Trindade, hato’o agradesementu ba JICA iha Timor-Leste no Indonézia inklui ministériu transporte Indonézia ne’ebé apoia ona formasaun ne’e.

“Ami kontinua husu atu apoia nafatin formasaun, atu ami iha koñesementu di’ak liutan ba dezenvolvimentu no manutesaun aeroportu iha aeroportu internasionál Nicolau Lobato”, afirma nia.

Treinamentu ne’e hanesan kontinuasaun apoiu hosi JICA ba Estadu. Programa kooperasaun tékniku ne’ebé ho durasaun tinan rua ne’e implementa ona deszde 2019.

Totál orsamentu ne’ebe alokadu ba programa tinan rua hamutuk UDS$140.000.00.

Funsionáriu hosi ANATL sira ne’e sei aprende buat barak iha área aeroportu nian hosi peritu sira ministeriu transporte Indonézia-nian, nune’e sira bele kontribui dezenvolve área aeroportu iha TL.

Programa treinamentu online ne’e sei realiza tan iha fulan-marsu oin mai no sei foka mós ba área importante tolu seluk mak; jestaun finanseiru ba aeroportu, sistema jestaun seguransa no jestaun aeroportu ho númeru partisipante ne’ebé hosi 12 to’o 15.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here