Prezidente Komisaun A PN, Joaquim dos Santos, Imajen Tatoli/António Gonçalves

DILI, 22 fevereiru 2021 (TATOLI)-Prezidente Komisaun A Parlamentu Nasionál (PN) ne’ebé trata asuntu Justisa no Konstitusionál, Joaquin dos Santos, solisita ba Komisaun Anti-Korrupsaun (CAC) atu haforsa estrutura hodi implementa lei foun Medida Prevensaun no Kombate Korrupsaun (MPKK).

“Lei MPKK ne’ebé hahú ohin tama iha vigór,  importante tebes  ba CAC atu bele hala’o kna’ar ho efisiénsia no efikás, tanba ne’e presiza  haforsa estrutura CAC liu-liu rekursu umanu, ekipamentu no infraestrutura,’’ Deputadu Joaquin dos Santos, hateten iha nia diskursu iha ámbitu komemorasaun aniversáriu CAC nian ba dala-XI no mós lansamentu ba implementasaun lei MPKK iha edifísiu Ministériu Finansas, Dili, segunda ne’e.

Notísia Relevante : Deklara riku-soin, CAC hahú arrola kargu xefia iha instituisaun Estadu

Nia dehan,  Governu nia polítika tenke fó apoiu ba CAC liu-liu alokasaun Orsamentu Jerál Estadu (OJE) sufisiente hodi kria kondisaun reforsa servisu sira CAC nian.

Tuir nia haree lei MPKK ne’e mós fó responsabilidade boot ba CAC atu simu deklarasaun bens no interese ba kargu xefia sira iha administrasaun públika, tanba ne’e atu atinje ho di’ak ba implementasaun, maka parte hotu presiza kontribui durante prosesu sira lao.

Nia esplika, objetivu hosi  konseitu lei atu lori ema hotu ne’ebé hetan responsabilidade asume kargu Estadu nian atu garante servisu ho transparénsia no garante boa-governasaun.

“Norma ne’e aplika fiar katak tinan oin mai ita bele hetan ona frekuénsia krime korrupsaun sei tun, tanba ne’e tenke hetan divulgasaun kle’an atu lori koñesimentu ba servidór Estadu no sidadaun hotu,” Joaquim dos Santos hateten.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here