Enumeradór-sira iha sesaun foto hamutuk ho ekipa BCTL hafoin formasaun iha Igreja Antiga Letefoho, sábadu (20/02). Imajen Tatoli/Antónia Gusmão.

ERMERA, 21 fevereiru 2021 (TATOLI)—Enumeradór-sira hosi eskola Sekundáriu Katólika Nossa Senhora do Carmo Letefoho, munisípiu Ermera na’in 90 prontu atu implementa rezultadu formasaun hosi Banku Sentrál Timor-Leste (BCTL, sigla portugés) kona-bá peskiza karaterístika ekonómika no inkluzaun finanseira.

“Maski formasaun loron ida de’it, maibé ami aprende netik buat foun hosi BCTL. Ne’e hanesan bukae ne’ebé ami sei implementa iha prátika, tanba sei prepara di’ak liután iha loron sira tuir-mai hodi hala’o peskiza iha komunidade”, Estudante Octavia Filomena Tavares (17) hateten ba jornalista Agência Tatoli hafoin formasaun iha Igreja antiga Letefoho, sabádu (20/02).

Octavia espera ho formasaun ne’ebé nia simu sei implementa ho di’ak nune’e labele lakon konfiansa hosi BCTL.

“Ami promete sei halo peskiza ho di’ak atu BCTL bele uza hodi dezeña programa di’ak ba postu administrativu ne’e,” Octavia promete.

Alende ne’e estudante Abrão de Deus (18) konsidera formasaun ne’e benefisia direta ba negosiante iha Letefoho ne’ebé sei ajuda tebes atu halo negósiu hodi hasa’e ekonomia família.

“Buat ne’ebé ami hetan importante tebes tanba hanorin ami liuliu oinsá rai osan bainhira halo negósiu-ruma no bele introdúz ba família inklui agrikultór-sira. Ami prontu atu tun ba hasoru-malu ho komunidade liuhosi peskiza ne’ebé sei hala’o,” Abrão deklara-ninia prontidaun.

Francisca de Deus (16) konsidera nu’udár oportunidade di’ak ne’ebé durante ne’e seidauk hetan.

“Ha’u sente katak, formasaun hosi BCTL nu’udár informasaun baze atu bele tun ba terrenu no agradese ba instituisaun finanseira ne’e”,  Francisca agradese.

Estudante ne’e konsidera formasaun hosi BCTL kompletu tanba iha teoria no simulasaun ne’ebé sai baze atu aplika iha terrenu.

Natureza hosi programa ne’e atu oferese formasaun ba estudante sira oinsá halo peskiza ba atividade ekonómika finanseira iha komunidade nia leet ne’ebé BCTL sei halo análiza hodi kria programa espesífiku iha Letefoho.

Formasaun ne’e akompaña hosi Vigáriu kooperadór Parókia Nossa Senhora do Carmo Letefoho, Padre Eugénio Redentór no profesór-sira.

Notísia relevante: http://www.tatoli.tl/2021/02/20/bctl-realiza-formasaun-kona-ba-peskiza-karateristika-ekonomika-ba-estudante-letefoho/

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here