iklan

NASIONÁL, JUSTISA, DILI, HEADLINE, SAÚDE

PCIC-Laboratóriu Nasionál asina akordu kooperasaun iha area formasaun

PCIC-Laboratóriu Nasionál asina akordu kooperasaun iha area formasaun

PCIC ho Laboratóriu Nasionál Saúde estabelese akordu kooperasaun iha area formasaun téknika laboratorial. Imajen Tatoli/Nelson de Sousa

DILI, 19 fevereiru 2021 (TATOLI)-Polísia Sientífika Investigasaun Kriminál (PCIC) ho Laboratóriu Nasionál Saúde, sesta ne’e, asina akordu kooperasaun iha area  formasaun téknika laboratorial ba periodu tinan-rua (2021-2022).

Serimónia ne’e hala’o iha edifísiu PCIC, Caicoli, Dili, ne’ebé asina direita hosi Diretór Nasionál PCIC, Vicente Fernandes e Brito ho Diretór Ezekutivu Laboratóriu Nasionál Saúde, Endang Soares da Silva.

PCIC ho Laboratóriu Nasionál Saúde, estabelese kooperasaun. Imajen Tatoli/Nelson de Sousa

Vicente Fernandes e Brito, esplika objetivu prinsipál hosi akordu kooperasaun ne’e, oinsá atu halo kapasitasaun téknika iha servisu laboratorial nian, liu-liu ba matéria biolojia (forensik DNA), toksikolojia (analiza krime droga) ho formasaun sira seluk ba kuadru espesialista sira no mós iha futuru bele abranje troka informasaun entre instituisaun rua-ne’e.

“Asinatura akordu ne’e hodi formaliza dokumentu entre instituisaun rua atu hala’o atividade sira hanesan formasaun faze estájiu troka boa prátika koñesimentu iha area laboratorial,” Vicente Fernandes e Brito hateten.

Nia hateten, hafoin asina akordu ne’e iha faze primeiru espesialista superior estaziadu na’in-tolu hosi PCIC sei halo faze estájiu iha Laboratóriu Nasionál Saúde durante fulan-neen.

“Bele dezenvolve rekursu umanu liga ba laboratorial saúde no PCIC    kontribui ba servisu hodi hatudu kompromisu entre instituisaun-rua atu bele alkansa misaun no natureza servisu,” Vicente Fernandes hateten.

Vicente Fernandes, hateten ho intervensaun servisu laboratorial bele kondús investigasaun ida esklarese hodi rekolla prova sira ne’ebé hala’o ba kazu ruma hodi aprezenta ba iha Tribunál.

Iha fatin hanesan diretora ezekutiva Laboratóriu Nasionál Saúde, Endang Soares da Silva, kompromete prontu kolabora hodi servisu hamutuk PCIC hodi atinje meta sira ne’ebé hatuur iha akordu laran.

Jornalista   : Nelson de Sousa

Editór        : Francisco Simões

iklan
iklan

Leave a Reply

iklan
error: Content is protected !!