Komunidade suku Manleuana, postu adminisrativu Dom Aleixo, troka voucher ho produtu Cesta Bázika iha supermerkadu Leader, tersa (09/02). Imajen TATOLI/António Gonçalves

DILI, 19 fevereiru 2021 (TATOLI)Implementasaun programa Cesta Básica faze daruak ne’ebe hahú iha janeiru to’o ohin loron kontinua la’o normál, ho totál distribuisaun ba populasaun iha territóriu tomak hamutuk 810.103 (ekivalente 62.31%), hosi totál benefisiáriu millaun 1,5.

Distribui hosi ministériu implementadór sira hanesan Ministériu Turizmu, Komérsiu no Indústria (MTKI) atinje ona  40,5%, Sekretaria Estadu Kooperativa (SEKoop) 73,9%, Ministériu Agrikultura no Peska (MAP) 88,4%, no Sentru Lojístika Nasionál (CLN, sigla portugés) 58,5%.

“Ita kontinua superviziona no aviza fornesedór sira atu kontinua serbisu ho padraun, hodi la halo manipulasaun ba presu sasán ne’ebé distribui ba ita-nia povu,” Ministru Koordenadór Asuntu Ekonómiku, Joaquim Amaral, hateten liuhosi nota ne’ebé Agência TATOLI asesu, sesta ne’e.

Notísia relevante: Cesta Bázika foin atinje 50%, posibilidade sei halo estensaun distribuisaun

Programa Governu kurtu prazu iha ámbitu rekuperasaun ekonómika ne’e, nu’udar medida  restrisaun iha luta kontra surtu COVID-19, hodi salva no proteje funsionamentu ekonomia rai-laran.

Ho objetivu kria kondisaun liuhosi aumenta rendimentu agrikultór, inklui apoia família ho nesesidade bázika hodi kombate hamlaha liuhosi kontribuisaun ai-han ne’ebé iha nutrisaun ba uma-kain hotu iha Timór laran.

Iha faze implementasaun programa Cesta Bázika faze daruak, Ministériu Koordenadór Asuntu Ekonómiku (MKAE) kontinua enkoraja ajente fornesedór atu kumpre regra no la halo manipulasau presu sasán ne’ebé define hamutuk ona.

Medida apoiu família sira liuhosi programa Governu, ho nia perspetiva hodi estímulu ekonomia rai laran ba períodu kurtu prazu, bazeia ba dekretu-lei númeru  48/2020, 07 outubru kona-ba adota medida apoiu família liuhosi atribuisaun ‘Cesta Bázika’ hosi operadór ekonómiku lokál sira iha ámbitu planu rekuperasaun ekonómika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here