Primeiru-Ministru, Taur Matan Ruak, konvoka enkontru ho Prezidente Konsellu Administrasaun EDTL,E.P, Paulo da Silva, iha Palásiu Governu, tersa (18/02). Imajen TATOLI/Egas Cristovão

DILI, 18 fevereiru 2021 (TATOLI)—Prezidente Konsellu Administrasaun Eletricidade de Timor-Leste, Empreza Públika (EDTL,E.P), Paulo da Silva, hateten fasilidade no infraestrutura eletrisidade ezistente antigu halo ahi mate bebeik, tanba ne’e empreza estatál ne’e sei halo planu di’ak ba inspesaun rutina feeder (liña transmisaun).

“Ba oin ami presiza halo planu sistemátiku ida, ha’u orienta ona tékniku sira hahú prepara planu halo inspesaun rutina (kada semana) hodi haree feeder hotu hadi’a tutuir. Ajuda téniku sira kona-ba planeamentu, manutensaun no mós kompra ekipamentu rezerva sira hodi halo manutensaun,” Prezidente EDTL relata hafoin enkontru ho Primeiru-Ministru, Taur Matan Ruak, iha Palásiu Governu, kinta ne’e.

Tuir Dirijente ne’e, fatór seluk ne’ebé halo ahi mate maka komunidade laiha konsiénsia hodi kontinua dada ahi eletrisidade ilegál.

“Liña distribuisaun sira besik ai no bainhira ai ne’e aumenta a’as kona infraestrutura eletrisidade ezeistente sira no seluk maka trafo dala-ruma rabenta kauza hosi ligasaun ilegál barak, nune’e kapasidade liu tiha trafo sira ne’ebé monta,” nia akresenta.

Aleinde ne’e, EDTL identifika komunidade barak mak sei dada ahi ilegál, tanba ne’e sei halo regra hodi regulariza asesu enerjia eletrisidade, atu nune’e bele kontrolu di’ak no sei forma ekipa halo inspesaun rutina ba iha konsumidór sira hotu.

Empreza estatál ne’e mós iha ona planu atu dijitaliza liña distribuisaun hotu tanba daudaun uza hela sistema manuál, nune’e tékniku sira fasil identifika problema eletrisidade ruma.

“Entaun kuandu avaria, tékniku sira identifika ladi’ak no tenke tun direta ba terrenu hahú kedas hosi Kamea la’o tuir feeder ne’ebé mate, iha kalan tenke leno tuir ai-rin sira. Situasaun ne’e lori tempu naruk, ekipamentu mínimu no menus rekursu, difikulta identifika lalais problema sira ne’e bainhira ahi mate,” nia hatutan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here