Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão.

DILI, 18 fevereiru 2021 (TATOLI)—Plenária Parlamentu Nasionál baixa ona proposta-lei Rejime Jurídiku Asosiasaun Públika Profisionál no proposta-lei Orden Advogadu Timor-Leste ba Komisaun A ne’ebé trata asuntu justisa no konstitusionál.

Proposta-lei rua ne’e ho númeru 25/V(3a) kona-ba Rejime Jurídiku Asosiasaun Profisionál no proposta-lei númeru 26/V(3a) kona-ba Orden ba Advogadu sira iha Timor-Leste.

Plenária Parlamentu Nasionál baixa proposta-lei rua ne’e iha loron tersa 16 fulan fevereiru tinan 2021.

Prezidente Komisaun A, Deputadu Joaquim dos Santos, esplika proposta-lei ne’e baixa ho urjénsia tanba ne’e komisaun sei haree hafoin aprezenta relatóriu no paresér ba plenária.

“Komisaun A simu ona proposta-lei foun rua ne’e. Ida, kona-ba Rejime Jurídiku Asosiasaun Públika Profisionál no ida seluk mak proposta-lei Orden Advogadu sira iha Timor-Leste. Ne’ebé, agora ajusta hela ami-nia kalendáriu tanba pedidu mai ne’e urjente de’it. Ami haree hela tanba prosesu balun la’o hela iha komisaun,” Deputadu Joaquim dos Santos informa ba jornalista sira iha Parlamentu Nasionál, kinta ne’e.

Nia esplika, proposta-lei rejime jurídiku ne’e atu hamoris profisionál públika sira-nian iha Timor-Leste.

Nune’e mós proposta-lei kona-ba orden advogadu Timor-Leste atu regula advogadu sira-ne’ebé hala’o kna’ar advokasia nian.

“Kuandu orden adgvogadu ne’e sai (vigora) entaun orden barak bele mosu, hanesan orden ba médiku sira no orden seluk tán bele mosu,” nia hateten. 

Prezidente Komisaun A seidauk bele esplika detallu substánsia hosi proposta-lei foun rua ne’e tanba seidauk halo ajendamentu nível komisaun nian.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here