Matebian MCS mate mistériu iha apartamentu ida iha area Hudi-Laran, Dili. Imajen/Espesiál

DILI, 18 fevereiru 2020 (TATOLI) – Autoridade Polísia Forensik hein hela desizaun ka autorizasaun hosi família atu halo autópsia ba mate-isin MCS.

MCS mate mistériu iha apartamentu ida iha area Hudi-Laran, Dili, kuarta (17/02). Tuir informasaun ne’ebé Polísia halibur iha fatin akontesimentu katak, MCB ba apartamentu  ne’e ho feto ida (oras la apuradu).

Iha tuku 15:00 Otl, Polísia Forensik simu telefone hosi apartamentu refere katak iha ema deskoñesidu ida monu mate-malirin hela iha apartamentu ne’e no deskonfia keta monu tanba afeta surtu COVID-19.

Bainhira rona informasaun ne’e, Komandante Forensik hosi Polísia Nasional Timor-Leste (PNTL), Inspetór Aquiles Sarmento Varela, informa kedas ba ekipa Sentru Integradu Jestaun Krize   (CIGC) hodi bele halo atendimentu ba matebian.

Lakleur de’it, Inspetór Aquiles Sarmento Varela, haktuir Polísia Eskuadra Aimutin mós to’o iha fatin akontesimentu no hamutuk ho Forensik halo kedas investigasaun hodi buka hatene matebian ninia orijen no kauza saida mak halo matebian mate derrepente de’it iha apartamentu nia laran.

Polisia Forensik mós konfirma CCTV, maibé la haree momoos no labele koñese feto ida ne’ebé ba ho matebian. Tanba feto ne’e nia oin taka metin ho máskara. Maibé Autoridade Polísia kontinua elabora investigasaun profunda hodi buka hatene loloos kauza hosi matebian nia mate no identifika feto ne’ebé hamaluk matebian iha apartamentu laran to’o matebian hakotu iis derrepente.

“Ami haree ninia identidade ne’e, matebian ne’e naran ho inisiál MCS, nia hola responsabilidade hanesan dirijente ida iha instituisaun Governu. Hosi kartaun identidade ne’ebé ami foti hosi matebian nia bolsu-laran katak matebian nia orijen hosi Postu Administrativu Lekidode, Munisípiu Aileu,”  Inspetór Aquiles Sarmento, haktuir ba Agência TATOLI via telefone iha Ospitál Nasional Guido Valadares (HNGV), Dili, kuarta kalan.

Mate-isin daudaun ne’e iha hela HNGV hodi hein desizaun família atu submete ba  autópsia hodi buka hatene loloos kauza hosi matebian nia mate ne’ebé sei mistériu hela.

Inspetór Aquiles Sarmento hateten, bainhira informasaun ne’e sirkula ona iha rede sosiál no iha públiku, maka  matebian nia fen no oan rasik mós marka prezensa kedas iha Mortuáriu HNGV nian.

Matebian nia fen informa katak, nia la’en sai hosi uma fó hatene hela ba sira iha uma, inklui nia rasik katak, matebian atu ba tuir formasaun ka kursu. Maibé teki-teki de’it, família simu informasaun dehan, matebian mate mistériu fali iha apartamentu ida iha area Hudi-Laran nian.

“Ha’u hanoin atu halo autópsia ka lae, depende fila fali ba família, tanba dala-ruma atu halo autópsia ba mate-isin ruma ba kazu hanesan ne’e, família sira sempre halo intervensaun. Ami Polísia Forensik ninia servisu mak ema oho aan ka kazu hanesan ne’e, ami tenke ko’alia didi’ak ho nia família atu bele kolabora ho justisa,” Inspetór Aquiles Sarmento hateten.

Inspetór Aquiles Sarmento rasik hasoru-malu ona ho matebian nia família balun iha HNGV, maibé família seidauk bele foti desizaun tanba sei fila-fali ba halo koordenasaun ho família tomak hafoin sira fó fali informasaun ba Polísia Forensik.

To’o notísia ne’e publika autoridade Polísia Forensik seidauk bele fó sai kauza  loloos hosi insidente ne’e. Maibé,  Inspetór Aquiles Sarmento, relata mós katak matebian nia mate ne’e laiha indísiu violénsia.

“Iha fatin akontesimentu Polísia Forensik hetan duni ai-moruk ka obat kuat nia kulit. Mas ita seidauk bele hatene obat kuat ne’e matebian mak konsumu ka feto mak konsumu. Talvés matebian mate tanba kauza hosi moras seluk. Ida-ne’e ita so bele prova liuhosi investigasaun profunda no autópsia ba mate-isin,”  Inspetór Aquiles Sarmento hateten.

Jornalista     : Domingos Piedade Freitas

Editór            : Francisco Simões

HAKEREK NO HATÁN

Please enter your comment!
Please enter your name here