Komandu Polísia Munisipiu Dili detein suspeitu X ne’ebé deskonfia obriga vítima ATM halo relasaun seksuál durante selebra loron valentine, 14 fevereiru 2021 iha ponte okos área Vemasse, Munisípiu Baucau. Imajen Tatoli/Eugénio Pereira

DILI, 16 fevereiru 2021 (TATOLI)-Joven na’in-rua ho inisiál X (mane) ho ATM (feto) tenke submete ba investigasaun tanba prátika relasaun seksuál iha ponte okos hodi festeja loron domin ka loron valentine, 14 fevereiru, foin lalais ne’e.

X nu’udar namoradu hosi ATM tenke simu títulu suspeitu tanba tuir deklarasaun nia namorada ATM hanesan vítima katak, X maka obriga tenke halo relasaun seksuál maske iha fatin ne’ebé la’ós apropriadu alias iha de’it ponte okos hodi selebra loron valentine hodi prova domin ba malu.

Komandu Polísia Munisipiu Dili liuhosi Servisu Informasaun Polísia (SIP) no Unidade Pesoál Vulneravel (UPV/VPU) Dili, tersa ne’e, detein suspeitu X ne’ebé obriga nia namorada  ATM halo relasaun seksuál iha ponte okos iha área Caravela, Postu Administrativu Vemasse, Munisípiu Baucau.

Polísia detein ATM ho X iha área Largo Lesidere, Dili, purvolta tuku 09:10 Otl, hodi kontinua lori ba VPU Komandu PNTL Dili hodi submete ba investigasaun  no tenke kumpre detensaun oras 72 iha sela polísia.

Vítima ATM no família sira rasik mak hato’o keixa ba PNTL hodi detein suspeitu X tanba lamenta aktu obriga halo relasaun seksuál hasoru ATM  ne’ebé ikus mai sira-nia vídeo viral iha rede sosiál Facebook.

Tuir dadus ne’ebé polísia rekolla, antes atu ba selebrasaun loron valentine ne’e, suspeitu X kontaktu vítima ATM sai hosi nia hela fatin  iha area Postu Administrativu Venilale atu ba paseiu iha tasi-ibun Caravela, Vemasse nian. Nune’e sira na’in-rua halo duni viajen to’o lori malu ba halo relasaun seksuál iha ponte okos.

Segundu Komandante PNTL Munisípiu Dili, Superintendente Euclides Belo, informa parte SIP no VIP sei kontinua buka tuir nafatin paradeiru suspeitu mane ida tan nu’udar abitante Postu Administrativu Vemasse ne’ebé lori telefone hodi halo filmajen ba suspeitu no vítima iha ponte okos.

“Suspeitu ba tula vítima (ATM) atu la’o pasiar, ikus mai sira-nia vídeo sai viral fali, tanba ne’e ami sei halo prosesu investigasaun profunda ba suspeitu ida ne’ebé halo filmajen,” Euclides  Belo hateten ba jornalista sira iha Komandu PNTL, Dili.

PNTL konsidera aktu halo filmajen sein koñesimentu hosi na’in ka vítima hodi fó sai iha media sosiál konsidera krime kontra ema nia integridade no sei halo prosesu investigasaun hodi promove kazu ne’e ba Ministériu Públiku.

 Jornalista  : Eugénio Pereira

Editór        : Francisco Simões

3 KOMENTÁRIU

  1. Agradese tanba video ne mak hodi feto ho nia familia ba keixa no polisia bele hatene dehan katak iha loron domin akontesimentu hanesan ne’e, lae karik ita rona mak rezultadu soe bebe🤢🤢

HAKEREK NO HATÁN

Please enter your comment!
Please enter your name here