Tékniku EDTL halo instalasaun eletrisidade iha área Bebora, Dili. Imajen TATOLI/Antó Gonçalves

DILI, 15 fevereiru 2021 (TATOLI)Asosiasaun TANE Konsumidór husu ba Eletricidade de Timor-Leste, Empreza Públika (EDTL,E.P) atu fó atensaun ba protesaun konsumidór iha ámbitu kualidade téknika no relasaun kontratuál entre empreza ho konsumidór sira.

Asosiasaun ne’e preokupa ho prestasaun servisu públiku esensiál sira hanesan eletrisidade tanba servisu ne’e indispensável atu garante moris di’ak no kualidade ba konsumidór sira.

“Ami simu reklamasaun barak husi konsumidór ne’ebé insatizfeitu no sai vítima (lezadu) iha sira-nia direitu no interese ekonómiku husi atuasaun  EDTL.E.P,” refere nota ne’ebé Agência TATOLI asesu, segunda ne’e.

TANE simu reklamasaun konsumidór kona-ba problema fornesimentu eletrisidade falla bebeik no interrupsaun servisu ne’ebé impede konsumidór ninia sasán uma laran a’at no la konsege halo tarefa bázika iha uma laran.

“Ami reivindika antes atu fornese enerjia elétrika, presiza selebra lai kontratu entre EDTL,E.P ho konsumidór, atu nune’e bele ezije kualidade prestasaun servisu esensiál ida-ne’e hodi labele para no responsabiliza hadi’a fali sasán a’at no lakon tanba interrupsaun  fornesimentu eletrisidade,” Asosiasaun ne’e afirma.

TANE reprezenta konsumidór timor-oan tomak, atu garante respeitu lejítimu direitu no interese konsumidór, liuliu kbiit laek sira.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here