Líder nasionál, Kay Rala Xanana Gusmão, hamutuk ho família matebian, hiit kaixaun matebian Domingas Álvares Fernandes, iha Bairro Pité, domingu (14/02). Imajen/Nelson de Sousa

DILI, 14 fevereiru 2021 (TATOLI)—Domingas Álvares Fernandes ho idade 72, ne’ebé hanesan kaben husi liurai Mehara-Lautém, saudozu Miguel dos Santos ho naran kódigu ‘Cuba’, hakotu iis derrepente iha dalan área Becora, Dili, iha sábadu (13/02).

Angelita Fernandes nu’udár oan haktuir, iha sábadu tuku 11:30, hamutuk ho matebian no beioan-sira halo viajen husi munisípiu Lautém mai Dili ho saúde di’ak.

Bainhira to’o iha Becora, lorokraik ona no karreta ne’ebé sira uza roda aar menus, ne’ebé tenke para iha ofisina ida iha estrada-ibun hodi rezolve.

“Matebian fó osan hodi selu ofisina ne’e. Fó tiha osan matebian hamnasa maka’as hodi dada iis halo kakorok naruk to’o iis kotu kedan iha fatin, ne’ebé ami para,’’ Angelita Fernandes hateten ba Agência TATOLI, iha Perunas, Bairro Pité, domingu ne’e.

Ho akontesimentu ne’e, Angelita Fernandes konsege transporta kedan matebian mai Hospitál Nasional Guido Valadares (HNGV), maibé médiku sira koko tensaun no fuan la funsiona.

“Nune’e to’o tuku 19:03 doutór sira entrega mai ami dehan labele salva tanba iis laiha ona,” nia konta tuir.

Nia haree no akompaña katak durante ne’e matebian la konsumu ai-moruk ruma tanba la sofre moras ruma.

Matebian Domingas Álvares Fernandes. Imajen/Espesiál

Matebian Domingas Álvares Fernandes moris iha loron  26 janeiru 1949, iha suku Mehara, postu administrativu Tutuala, munisípiu Lautém, ne’ebé hanesan oan husi Inês Álvares Fernandes ho Augusto Álvares Fernandes.

Matebian kaben ho liurai Mehara Miguel dos Santos ‘Cuba’ ne’ebé mate iha 10 dezembru 1989.

Matebian iha oan mane na’in-haat no oan feto na’in-rua ne’ebé oras daudaun sei moris hotu.

Domingas Álvares nia kaben antes ne’e subar líder rezisténsia Kay Rala Xanana Gusmão iha sira-nia uma Mehara, hodi asegura husi militár  Indonézia labele hatene bainhira Xanana hakerek dokumentu no halo diskusaun kona-ba  reorganiza funu.

Iha momentu ne’ebá, marka mós prezensa husi Bispu Dom Martinho Lopes, ne’ebé ikus-mai lori sai dokumentu importante ba rai-li’ur hodi fó sai ba mundu kona-ba ezisténsia husi ema rezistente sira iha Timor-Leste.

“Kona-ba kontribuisaun hau-nia inan iha tempu luta libertasaun, entre 1981 to’o 1982 nia serbisu duni. Maibé atu kompletu liu Maun Xanana mak bele hatene, tanba sira mak serbisu hamutuk. Sira hasoru-malu ho Bispu Dom Martinho iha pai no mãe nia kuartu iha uma Mehara,” nia haktuir.

Kona-ba rekoñesimentu, nia dehan, Estadu fó ona ba sira-nia aman, kondekorasaun inklui subsídiu, maibé sira-nia inan mak Estadu seidauk fó rekoñesimentu.

“Ha’u-nia inan fó ona kontribuisaun ba luta no tama komarka dala-rua. Maibé, foin iha 2020 mak Sekretaria Estadu Kombatente no Libertasaun Nasionál halo verifikasaun ba dokumentu sira,” Angelita Fernandes hatutan ho matan been.

Iha okaziaun ne’e, líder nasionál Kay Rala Xanana Gusmão marka prezensa no presta omenajen ikus ba matebian.

Tuir planu, família sei transporta mate-isin ohin hodi ba haloot iha suku Mehara, postu administrativu Tutuala, munisípiu Lautém.

Jornalista: Nelson de Sousa

Editora: Julia Chatarina

HAKEREK NO HATÁN

Please enter your comment!
Please enter your name here