Embaixadora Malázia iha Timor-Leste, Sarimah Akbar. Imajen TATOLI/Evaristo Soares Martins.

DILI, 11 fevereiru 2021 (TATOLI)–Embaixadora Malázia iha Timor-Leste, Sarimah Akbar, hasoru malu ho Prezidente Parlamentu Nasionál (PPN), Deputadu Aniceto Longuinhos Guterres Lopes, hodi diskute futuru kooperasaun iha área rekursu umanu.

“Ami ko’alia kona-ba kooperasaun iha área rekursu umanu no bele fahe esperiénsia polítika públika, nune’e membru parlamentu sira bele halo interasaun,” Sarimah Akbar informa ba jornalista sira hafoin hasoru malu ho Prezidente Parlamentu Nasionál iha PN, kinta ne’e.

Embaixadora Malázia ne’e mós oferta ba Prezidente Parlamentu Nasionál kona-ba kapasitasaun iha área rekursu umanu liuliu ba membru parlamentu foinsa’e sira, tanba iha futuru ne’e rekursu umanu importante iha atividade parlamentár.

Embaixadora Sarimah Akbar fundamenta, parte hosi kooperasaun ne’e bele membru parlamentu sira hasoru malu direta hodi fahe perspetiva kona-ba atividade parlamentár.

“Sira bele halo interasaun no fahe ideia, fahe koñesimentu ba malu,” nia subliña.

Maibé, nia dehan, kooperasaun refere labele akontese iha tempu badak nia laran tanba mundu hasoru hela pandemia globál COVID-19.

Entretantu, Prezidente Parlamentu Nasionál, Aniceto Longuinhos Guterres Lopes, konkorda ho proposta kooperasaun iha atividade parlamentár ne’ebé oferta hosi Embaixadora Malázia ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here