Komandante Jerál PNTL,, Komísariu Faustino da Costa. Imajen TATOLI/Egas Cristovão

DILI, 11 fevereiru 2021 (TATOLI)–Komandante Jerál Polísia Nasionál Timor-Leste (PNTL), Komisáriu Faustino da Costa, informa  situasaun jerál iha territóriu laran, hanesan kazu asidente trafégu no insidente ba Prezidente Repúblika, Francisco Guterres ‘Lú Olo’.

“Ami mai informa situasaun jerál  iha terriróriu Timor-Leste la’o di’ak, maski iha kazu asidente no insidente balun ne’ebé akontese, maibé konsege rezolve no prosesu tuir lei,” Komisáriu Faustino, hateten hafoin enkontru semanál ho PR Lú Olo, iha Palásiu Prezidensiál, Bairro Pité, kinta ne’e.

PNTL rejista kazu asidente trafégu 33, ne’ebé rezulta ema na’in-rua lakon vida ne’ebé akontese iha Baucau no Lospalos inklui kazu insidente hamutuk 55.

 “Kazu insidente ne’ebé ami atualiza ba Prezidente Repúblika mak laen ta’a feen iha Dili laran no matebian ida ne’ebé monu ba bee laran  iha lospalos no Ermera, aleinde iha kazu ema moras mental sunu uma lulik iha Aileu,” Komisáriu Faustino relata.

Tuir nia, kazu asidente trafégu ne’e maioria fatór husi ema-nia konsiénsia momentu kondús karreta no motor no maioria laiha karta kondusaun.

Entretantu, kazu insidente ne’e maioria kazu ofensa integridade fízika simples sira ne’ebé PNTL konsege detein hodi prosesa tuir lei.

Alende ne’e, Komisáriu Faustino mós informa ba Xefe Estadu kona-ba sidadaun ne’ebé tula pasiente pozitivu COVID-19 hetan ona kapturasaun no dadaun iha hela kuaretena obrigatóriu.

“Ita halo chek point konsege kaptura ona ojek ne’e, nune’e ami mós halo kapturasaun ba ojek ida tan ne’ebé tula feto ida ho nia oan hodi lori ona ba kuarentena,” nia akresenta.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here