Primeiru-Ministru, Taur Matan Ruak. Imajen TATOLI/Egas Cristovão

DILI, 11 fevereiru 2021 (TATOLI)Primeiru-Ministru (PM), Taur Matan Ruak, hateten Governu seidauk halo desizaun ruma atu sosa ai-moruk vasina AstraZeneca tanba sei dúvida ba nia efisiénsia.

Bazeia ba informasaun ne’ebé sirkula iha nível mundiál, Xefe Governu nota katak iha nasaun España ema balun de’it mak hetan vasina no seluk la hetan, enkuantu iha Portugal, ema ne’ebé ho idade 65 labele hetan vasina ne’e no iha Áfrika Súl suspende tanba dúvida nia efisiénsia.

“Informasaun barak perturba, halo ita la hakmatek no dúvida, ne’ebé horiseik enkontru Konsellu Ministru ami seidauk deside. Entaun ha’u husu kontinua rekolla informasaun husi Organizasaun Mundiál Saúde (OMS). Aban, ha’u husu enkontru ida ho Organizasaun Saúde Mundiál atu sira garante ba ita katak vasina ida ne’e di’ak,”  PM Taur hateten hafoin enkontru semanál ho Prizidente Repúblika, Francisco Guterres ‘Lú Olo’, iha Pálasiu Prezidensiál, Bairro Pité, kinta ne’e.

Maski nune’e, Governu kontinua prepara-an ba senáriu piór iha situasaun COVID-19, tanba ne’e esforsu-an atu hetan ai-moruk vasinasaun.

OMS fó hatene katak vasina AstraZeneca iha funsaun importante hanesan evita ema hetan moras COVID-19 ho situasaun grave, evita ema labele mate no evita mós ema atu ba ospitál.

“Forma jerál ida di’ak, maibé ita hakarak iha serteza, antes ita halo desizaun ida,” tenik Xefe Ezekutivu.

Iha sorin seluk, komisaun interministeriál ida ho komisaun téknika ne’ebé lidera husi Vise Primeiru-Ministru no Ministra Solidaridade Sosiál, Armanda Berta dos Santos, halo preparasaun planu vasinasaun liuliu asesu ba ai-moruk AstraZeneca.

Iha kuarta (05/02), Ministériu Saúde rejista tan timor-oan neen pozitivu COVID-19 no númeru pasiente ne’ebé iha sala izolamentu aumenta ba 29.

“Ita preokupa loos no fó risku boot ba ita liuliu iha evolusaun COVID-19 nian, tanba mai husi ita-nia nasaun viziñu hanesan Nusa Tengara Timur (NTT) no ita nia iha frajilidade ba pasajen ilegál iha fronteira terrestre,” nia hatutan.

Xefe Governu dekreta estensaun Estadu Emerjénsia ba dala-10 no deside reativa Sala Situasaun, Sentru Integradu Jestaun Krize (CIGC,sigla portugés), ne’ebé funsiona iha Sentru Konvesaun Dili (CCD, sigla portugés) ho unidade iha Rejiaun Administrativu Espesiál Oé-Cusse no Ambeno (RAEOA), Covalima no Bobonaro.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here