Formadu sira halo hela prátika iha Sentru Formasaun Tibar. Imajen TATOLI/António Gonçalves

DILI, 10 fevereiru 2021 (TATOLI)Diretór Sentru Formasaun Tibar, Simão Tito Bareto, hateten durante ezisténsia sentru ne’e to’o agora konsege forma ona joven barak, ne’ebé maioria hetan ona serbisu.

“Tinan 2002 to’o 2020 ne’e ita fó ona sertifikadu graduadu ba kritériu formasaun hamutuk 5.234,” Diretór Simão Tito, informa iha edifísiu Sekretaria Estadu Formasaun Profisionál no Empregu (SEFOPE), Caicoli, kuarta ne’e.

Husi númeru ne’e, tuir identifikasaun no monitorizaun ne’ebé sentru formasaun halo, joven hamutuk 3.129 maka asesu ona ba kampu traballu, enkuantu seluk kontinua estudu no pur volta 100 resin mak la hatene sira-nia paradeiru hafoin gradua.

Sentru Formasaun Tibar durante ne’e iha área formasaun hamutuk 14, ne’ebé área prinsipál liu maka konstrusaun sivíl.

“Área konstrusaun sivíl ne’e iha ramu lima hanesan eletrisidade, reparadór, karpintaria, pedreiru no soldadura,” nia hatutan.

Área formasaun seluk maka hanesan agrikultura ne’ebé haree ba ortikultura, floresta no mós jestaun ba ambiente no iha mós área formasaun ospitalidade ne’ebé halo preparasaun ai-han no bebida inklui ba housekeeping.

“Ita mós iha área formasaun marítima ho jestaun portu, hanesan sira ne’ebé prepara atu serbisu iha ró laran, ne’ebé programa ne’e hetan ona akreditasaun internasionál. Ne’e eziste durante tinan rua ona, espera ita-nia dezempeñu kontinua di’ak atubele hetan sertifikadu hanesan iha área sira seluk,” nia esplika.

Aleinde ne’e, iha mós iha área formasaun espesializada iha área mina no gas inklui eletrisidade.

Iha mós área formasaun ba ekipamentu pezadu ne’ebé haree ba eskavadór, utilizasaun mákina iha serbisu konstrusaun ninian no área espesializadu seluk liga ho bee no saneamentu.

“Ita iha tan área formasaun enerjia alternativa solar panél ne’ebé ita serbisu ho nível eskala kiik,” nia akresenta.

Sentru formasaun Tibar oferese mós formasaun iha área biogas no biomass, ne’ebé daudaun iha pur volta ema na’in-90 resin mak hahú ona formasaun.

Programa seluk maka estadu kurikulár no estajiu profisionál ba estudante no formadu sira.

Diretór sentru formasaun ne’e informa, semana ne’e sei iha rekrutamentu ba nível média iha área ospitalidade konstrusaun ninian atu hahú fó formasaun ba formadu sira iha semester dahuluk.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here