Reuniaun Konsellu Ministru, iha Palásiu Governu. Imajen TATOLI/Egas Cristóvão

DILI, 10 fevereiru  2021 (TATOLI)–Governu sei halo alterasaun daneen ba lei númeru 7/2006, loron 28 dezembru, kona-ba Lei Eleitorál ba Prezidente Repúblika.  

Iniasiativa ne’e aprezenta husi Ministru Administrasaun Estatál (MAE), Miguel de Carvalho, iha reuniaun Konsellu Ministru (KM), ho forma opsaun polítika-lejizlativa

“Haree ba besik eleisaun prezidensiál, opsaun sira ne’ebé aprezenta ona ho objetivu atu adekua ba situasaun atuál, iha kontestu pandemia COVID-19 no reforsu ba kapasitasaun nu’udár resposta ida di’ak liu ba nesesidade sidadaun sira,” Ministru Prezidénsia Konsellu Ministru, Fidelis Manuel Leite Magalhães, informa hafoin ramata reuniaun KM iha Palásiu Governu, kuarta ne’e.

Ho hanoin hirak ne’e maka Governu hakarak halo rekizitu formál ba kandidatura, klarifikasaun, realizasaun prosesu eleitorál no fasilita kondisaun ba direitu votu sidadaun sira.

Tuir governante ne’e, foin iha faze diskusaun hodi hatúr no fahe informasaun kona-ba asuntu ou intensaun ne’ebé maka husi parte MAE hakarak altera.

Objetivu prinsipál maka atu garante katak bele iha biban ba sidadaun hotu ezerse direitu demokrátiku.

“Ezemplu simples ida maka iha eleisaun prezidensiál tuir mai, fatin votasaun sei tau to’o iha aldeia sira no bainhira jornalista sira ba halo kobertura karik bele vota iha fatin ne’ebé halo kobertura sein nesesariamente tenke vota iha fatin ne’ebé hatúr tiha ona kartaun eleitorál,” Ministru esplika.

Aleinde ne’e, opsaun polítika-lejizlativa ne’e ko’alia kona-ba oras abertura sentru votasaun sira no kandidatu ba ba Prezidente Repúblika.

“Rekezitu ne’ebé aplika la’ós de’it rejistu kriminál, maibé mós rekezitu saúde, katak ema ne’ebé atu kandidata-an ba Prezidente Repúblika tenke iha saúde ne’ebé di’ak ou labele ema moras. Bainhira eleitu karik labele ezerse funsaun tanba iha moras no mós moras mentál ruma karik, tanba ne’e tenke iha sertifikasaun saúde,” nia dehan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here