Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (10/02). Imajen TATOLI/Egas Cristovão

DILI, 10 fevereiru 2021 (TATOLI)–Governu apoiu finanseira hamutuk $120.000 ba reprezentasaun permanente Repúblika Árabe Saharauí iha Timor-Leste. 

Apoia ne’e aprezenta liuhosi projetu rezolusaun Governu, ne’ebé aprezenta husi Ministra Negósiu Estranjeiru no Kooperasaun, Adaljiza Albertina Xavier Reis Magno.

“Desizaun ne’e Governu delibera hodi fó apoiu osan ho montante $120.000  ba Árabe Saharauí ninia reprezentasaun iha Timor-Leste hodi kobre sira-nia atividade,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha Palásiu Governu, kuarta ne’e.

Portavós ne’e konsidera, medida ne’e atu reforsa lasu istóriku husi país rua, ho baze iha dezeju komún ba luta autodeterminasaun iha prinsípiu solidariedade.

“Luta povu ba libertasaun nasionál, direitu ba autodeterminasaun no independénsia, iha Konstituisaun Repúblika no iha Rezolusaun Parlamentu Nasionál sita ba solidariedade no apoiu ba povu Saharauí,” nia akresenta.

Timor-Leste kontribui dezde tinan 2011 ba funsionamentu reprezentasaun permanente iha Díli, liuhosi konsesaun subsídiu anuál ida ba atividade sira iha Timor-Leste no iha rejiaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here