DILI, 09 fevereiru 2021 (TATOLI)–Reprezentante povu iha uma fukun Parlamentu Nasionál (PN) rekomenda ba Governu liuhosi Ministériu Asuntu Kombatente no Libertasaun Nasionál (MAKL) atu aselera prosesu rekolla restu mortál nune’e bele haloot fatin ne’ebé dignu.
Komisaun F ne’ebé trata asuntu saúde, seguransa sosiál no igualdade jéneru, hato’o rekomendasaun ne’e bainhira aprezenta relatóriu vizita fiskalizasaun ba Munisípiu Baucau iha plenária Parlamentu Nasionál, tersa ne’e.
“Ami rekomenda atu aselera prosesu rekolla restu mortál sira-ne’ebé to’o agora seidauk hetan,” Sekretária Meza Komisaun F, Deputada Helena Martins Belo, informa liuhosi aprezentasaun relatóriu ba plenária.
Komisaun F vizita traballu ba fatin restu mortál Dubuai, iha Postu Administrativu Quelicai, Munisípiu Baucau, nota katak kondisaun uma ne’ebé harii ho karáter urjénsia iha 2014 ne’ebé sai hanesan fatin hodi haloot restu mortál hamutuk 499 ne’e ladi’ak ona.
“Kondisaun fatin ladi’ak ona hodi esrtraga fali tais no bandeira sira no bele mós monu bainhira akontese anin-boot,” relatóriu fiskalizasaun polítika hosi Komisaun F ne’e haktuir.
Komisaun F mós fó-sai katak, Governu destaka seguransa na’in-rua maibé presiza tau atensaun ba família sira-ne’ebé sempre hatuur ka hasa’e hahan tuir kultura Timor nian.
Ho kondisaun hirak-ne’e, Komisaun F husu Governu atu aselera konstrusaun monumentu no jardín eroi ba mártir libertasaun nasionál, rekomenda mós harii edifísiu konsellu veteranu iha munisípiu 12 no RAEOA hodi trata sasán sira-ne’e.
Komisaun F husu Governu tau atensaun ba komandante sira-ne’ebé partisipa iha luta ba libertasaun nasionál iha asaltu dahuluk iha Lakudala, Quelicai, ne’ebé seidauk hetan atensaun adekuada.
Nune’e mós husu apoia ambulánsia atu bele fasilita veteranu sira bainhira enfrenta kondisaun moras.
Komisaun F mós fó hanoin ba Governu kona-ba konstrusaun uma ba veteranu dezmobilizadu tinan 20 no 24 nian, atu halo diálogu no konsultasaun ho veteranu sira molok uma refere atu harii.
Jornalista: Evaristo Soares Martins
Editór: Cancio Ximenes
