Parlamentu Nasionál. Imajen Tatoli/ Egas Cristóvão

DILI, 09 fevereiru 2021 (TATOLI)–Parlamentu Nasionál, ohin, aprova proposta-lei baze jerál organizasaun administrasaun públika, hodi fó autorizasaun ba Governu regula órgaun Estadu direta, indireta no autónoma sira tanba dezde ukun rasik-aan laiha lei baze jerál ba administrasaun públika.

PN debate proposta-lei Númeru 15/V (2ª)-Autorizasaun Lejizlativa kona-ba baze jerál organizasaun administrasaun públika iha finál globál ho rezultadu votasaun a-favór 33 kontra 10 no abstensaun 8.

“Ho nune’e proposta-lei autorizasaun lejizlativa kona-ba baze jerál organizasaun administrasaun públika aprovadu,” Prezidente Parlamentu Nasionál, Deputadu Aniceto Longuingos Guterres Lopes, anunsia liuhosi plenária PN, tersa ne’e.

Proposta-lei ne’e aprezenta hosi Ministru Prezidénsia Konsellu Ministru Fidelis Leite Magalhães no Ministru Justisa Manuel da Costa Cárceres.

Governu husu autorizasaun ba Parlamentu Nasionál bazea ba Konstituisaun RDTL artigu 97 no artigu 115.

Organizasaun administrativa ne’e nu’udar instrumentu Estadu nian hodi halo atribuisaun interese públiku nian hodi atinje nesesidade koletiva populasaun nian.

Parlamentu Nasionál autoriza Governu hodi define baze organizasaun administrasaun públika, ne’ebé konsidera kompeténsia lejizlativa eskluziva relativamente ho organizasaun no funsionamentu iha administrasaun direta no indireta no mós papél superiór iha organizasaun públiku.

Nune’e mós habelar forma garantia unidade lejizlasaun iha matéria organizasaun administrativa.

Ministru Prezidénsia Konsellu Ministru, Fidelis Manuel Leite Magalhães, fundamenta proposta-lei ne’e laiha relasaun ho estatutu Komisaun Funsaun Públika (CFP-sigla portugés) no lei sira-ne’ebé kria CFP.

“Objetivu hosi lei autorizasaun ne’e simples loos, iha ita-nia Estadu ne’ebé mak direta no indireta ne’e kabe ba kompeténsia eskluziva Governu nian no mós órgaun autónoma sira,” Ministru Fidelis esplika.

Nia hatutan, Estadu tenke iha kondisaun eselente hodi lejizla baze jerál organizasaun administrasaun públika, ne’ebé iha tipu tolu (3) iha administrasaun hanesan direta, indireta no autónoma.

“Entaun atu ordena no organiza di’ak liután órgaun Estadu sira ka órgaun sira-ne’ebé fó servisu ba iha administrasaun públika entaun ita presiza lei ida-ne’ebé autoriza hosi parlamentu akordu ho konstituisaun hodi fó kompeténsia ba Governu hodi iha lei baze jerál ne’ebé hatuur ho didi’ak definisaun sira,” nia esplika.

Tanba kuadru ida-ne’e, Governu pasa ba dekretu-lei ida hodi define definisaun sira.

“Estadu hotu-hotu iha entendimentu hanesan kona-ba saida mak ita hanaran empreza públika, saida mak ita hanaran órgaun independente, saida mak ita hanaran órgaun autónoma tanba ita ukun-aan to’o agora kuadru ida-ne’e seidauk iha,” Ministru Fidelis argumenta.

Ho ida-ne’e mak VIII Governu Konstitusionál lideradu Primeiru Ministru (PM), Taur Matan Ruak, husu ba parlamentu fó autorizasaun.

Iha lei autorizasaun ne’e artigu hamutuk lima (5), artigu 1 define parlamentu autoriza hodi lejizla baze jerál ba organizasaun administrasaun públika.

Purtantu artigu 2 (sentidu) hodi define baze jerál ba organizasaun públika, artidu 3 (estensaun) hodi halo intervensaun lejizlativa hodi regula baze jerál no halo definisaun ba prinsípiu no aspeitu koerente organizasaun.

Nune’e mós artigu 4 (durasaun), iha lei autorizasaun ne’e konsedida ho durasaun loron 180 (180 dias) no artigu 5 (Entrada ein-vigór).

Jornalista: Evaristo Soares Martins

Editór: Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here