Médiku sira iha Sentru Saúde Comoro bainhira hala’o atendementu ba labarik ne'ebé halo tramentu saúde, Kinta (07 Janeiru 2021). Imajen Tatoli/Antonio Goncalves.

DILI, 09 fevereiru 2021 (TATOLI)–Komisaun F (saúde, seguransa sosiál no igualdade jéneru) iha Parlamentu Nasionál (PN) husu Governu liuhosi Ministériu Saúde (MS) atu estabelese rezidénsia ba médiku sira tanba durante ne’e hosi fatin dook mak sira halo tratamentu ba pasiente sira iha área rurál.

Situasaun ne’e Komisaun F lideradu Deputadu Noé da Silva “Buka-Tuir”, identifika iha Postu Saúde Laisorulai, Postu Administrativu Quelicai, Munisípiu Baucau.

“Ministériu Saúde presiza estabelese rezidénsia ba pesoál saúde ba médiku sira tanba médiku sira hela iha Baucau mak halo dezlokasaun loro-loron hodi halo servisu iha postu saúde Laisorulai,” Sekretária Meza Komisaun F, Deputada Helena Martins Belo, aprezenta relatóriu fiskalizasaun ba Munisípiu Baucau iha plenária PN, tersa ne’e.

Komisaun F deteta profisionál saúde kompostu hosi médiku jerál na’in-ida (1), parteira na’in-ida (1), enfermeira na’in-ida (1) no asistente enfermeira na’in-ida (1).

Ho númeru profisionál saúde ne’ebé limitadu halo mós atendimentu ba pasiente hosi Ossú-Samorogo, Venilale no Uatulari-Makadiki.

Komisaun F rekomenda atu eleva kapasidade Postu Saúde Laisorulai ba Sentru Saúde tanba Postu Saúde halo mós atendimentu ba pasiente ne’ebé mai hosi Postu Administrativu Venilale, Ossú no Uatulari.

Komisaun F mós deteta postu saúde iha tempu bailoron defísil tebes asesu ba bee-moos, no mós iha sala konsulta jerál ne’e presiza troka kulxaun ne’ebé aat ona no iha mós medical kit ne’ebé ho kondisaun ferrujen.

“Laiha armazen no sasán hirak ne’ebé tuir loloos rai iha armazen akomoda fali iha sala farmásia. Iha mós kama balun ne’ebé foin uza de’it tinan tolu (3) maibé hetan ona estragu,” relatóriu fiskalizasaun Komisaun F ne’e haktuir.

Iha vizita fiskalizasaun ne’e nota katak animál barak mak tama no halo fo’er iha área postu saúde refere tanba laiha moru protesaun.

Iha postu saúde ne’e mós laiha pesoál limpeza no pesoál saúde sira mak responsabiliza servisu ne’e hotu hafoin halo tratamentu ba komunidade.

Bainhira tempu udan, nia informa, populasaun defísil asesu ba postu saúde refere tanba laiha estrada, laiha ambulánsia atu transporta pasiente no dalaruma tula de’it ho kamoneta boot (truk).

“Laiha motorizada atu fasilita profisionál saúde sira-nia servisu. Tanba ne’e, Komisaun F husu aumenta pesoál rekursu umanu no mós eleva kapasidade ba sentru saúde,” Komisaun F propoin liuhosi relatóriu vizita fiskalizasaun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here