Ministru Administrasaun Estatál, Miguel Pereira de Carvalho. Imajen TATOLI/Egas Cristovão

DILI, 09 fevereiru 2021 (TATOLI)—Ekipa juri ba rekrutamentu administradór munisípiu konklui ona prosesu selesaun ba administradór munisípiu tolu no submete ona rezultadu ba Ministériu Administrasaun Estatál (MAE) atu submete nomeasaun iha reuniaun Konsellu Ministru.

“Juri konklui ona prosesu rekrutamentu  administradór munisípiu Covalima,  Ainaro no Aileu no konsellu konsultivu munisipál  husi munisipiu tolu ne’e pronúnsia ona kandidatu  sira ne’e. Falta de’it Konselu Ministru delibera liuhosi rezolusaun Governu ba  nomea administradór na’in-tolu no tempu hanesan halo ezonersaun ba na’in-tolu ne’ebé maka ezerse hela funsaun administradór, nu’udar forma subtituisaun,” Ministru Administrasaun Estatál, Miguel Pereira de Carvalho, informa hafoin hasoru malu ho Primeiru-Ministru, Taur Matan Ruak, iha Palásiu Governu, tersa ne’e.

Totál kandidatu munisípiu tolu ne’ebé haruka ona ba Konsellu Ministru mak munisípiu Aileu hamutuk ema na’in-tolu kompostu husi Abel da Conceição, Agosto Manuel da Oliveira, no João Fernando Martins Borges, munisípiu Ainaro kompostu husi ema na’in-haat hanesan Aguida judit Mendonça, Eduardo Lopes de Carvalho, Leovizildo Amaral Pereira, no Lourenço Barros Magno, no hosi munisípiu Covalima hamutuk na’in-haat hanesan Afonso Nogueira Nahak, Albino Carvalho Lelo, Damião Amaral, no Francisco Andrade.

Enkuantu, ba munisípiu lima hanesan Bobonaro, Liquiçá, Ermera, Manatuto no Dili foin mak konklui ezame eskrita.

“Agora faze tuir mai maka sei fó sai rezultadu ezame eskrita kandidatu aprovadu sira no sei haruka ba konsellu konsultivu munisipál atubele proúnsia,” nia akresenta.

Bainhira konsellu pronúnsia ona mak foin submete ba Konsellu Ministru hodi halo deliberasaun.

Aleinde ne’e, iha loron 11 to’o 13 janeiru, Governu liuhosi Ministru Miguel Pereira fó pose ba administradór munisípiu Lautém no Viqueque no iha loron 14 janieru 2021 fó pose ba prezidente autoridade munisípiu Baucau

Mandatu administradór munisipál no prezidente autoridade munisipál sira hatuur iha dekretu-lei númeru 03/2016, maibé ikus mai altera  ho dekretu-lei númeru 09/2018.

Jornalista: Natalino Costa     

Editora: Julia Chatarina

HAKEREK NO HATÁN

Please enter your comment!
Please enter your name here