Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos no Ministru Justisa Manuel Cárceres da Costa asina nota entendimentu hodi reforma programa entre Ministériu rua iha área reinsersaun Sosiál rekluzu hodi promove direitu eis rekluzu no sira-nia reinsersaun iha Komunidade. iha Salaun MSSI, Caicoli, segunda (08/02). Imajen TATOLI/Egas Cristovão.

DILI, 08 fevereiru 2021 (TATOLI)–Ministériu Solidaridade Sosiál no Inkluzaun (MSSI) ho Ministériu Justisa, ohin, asina nota entendimentu hodi reforma programa entre ministériu rua iha área reinsersaun sosiál rekluzu (reclusos) hodi promove direitu eis rekluzu sira-nia reinsersaun iha komunidade.

Vise-Primeiru Ministru no Ministra Solidaridade Sosiál no Inkluzaun (MSSI), Armanda Berta dos Santos, hateten estabelese nota entendimentu ne’e hodi implementa rekluzu no vizita família rekluzu ba programa reintegrasaun ba eis rekluzu.

“Programa asisténsia sosiál no apoiu reintegrasaun eis rekluzu tanba ita hotu hatene katak objetivu prinsipál hosi nota entendementu ida-ne’e nu’udar aktu legais ba parte rua. Nune’e, hodi define termu kooperasaun entre Dirasaun Nasionál Inkluzaun hosi MSSI ho Dirasaun Nasionál Servisu Prisionais no Reinsersaun Sosiál hosi Ministériu Justisa kona-ba programa asistensia sosiál ba apoiu reintegrasaun eis-rekluzu no vizita familia,” Armanda Berta dos Santos hateten iha ámbitu serimónia asina nota entendimentu ho MJ iha salaun MSSI, Caicoli, Dili, segunda ne’e.

Nia dehan, iha ámbitu kooperasaun ida-ne’e hakarak asegura no garante reintegrasaun rekluzu ne’ebé vulnerável ho dignu ba komunidade, depois kumpre responsabilidade kriminál iha prizaun no fasilita vizita família rekluzu vulnerável ne’ebé lahetan vizita hosi familia.

“Tanba ne’e, Governu tenke garante direitu hotu sidadaun sira-nian ho nakonu. Hein katak ho asina akordu ida-ne’e parte rua bele implementa tuir knaar no funsaun ida-idak nian no husu ba parte sira hotu atu iha komunikasaun di’ak ba implementa nota entendementu ida-ne’e ho di’ak,” nia hateten. 

Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos no Ministru Justisa Manuel Cárceres da Costa asina nota entendimento hodi reforma programa entre Ministériu rua iha área reinsersaun Sosiál reclusos, hodi promove direitu eis rekluzu no sira-nia reinsersaun iha Komunidade iha Salaun MSSI, Caicoli, segunda (08/02). Imajen TATOLI/Egas Cristovão.

Tuir nia, ba oin MSSI rasik hakarak halo diskusaun kle’an ho Ministru Justisa bele implementa programa balun hosi MSSI liuliu programa asisténsia sosiál ba apoiu kaisaun ba família vulnerável bele fó fiar ba prizioneiru sira-ne’ebé iha kapasidade karpintária bele oferese.

Nune’e, nia dehan, bainhira sira kumpre ona sira-nia kastigu hodi ba integra iha uma, sira iha mós rendimentu ka kapitál hodi ba hahú sira-nia vida ekonómia.

“Konseitu ka opinaun ida-ne’e ita-nia tékniku no jurídiku sira sei tuur hamutuk hodi haree enkuadramentu legál sira,” nia relata.

Entretantu, Ministru Justisa Manuel Cárceres da Costa hateten kona-ba nota entendimentu entre ministériu rua iha posibilidade bele servisu hamutuk ho MJ ba prosesu reinsersaun ba eis rekluzu sira.

Prosesu ida-ne’e prosesu naruk atu to’o iha liberdade totál, ne’ebé mak Tribunál hasai liuhosi prosesu reinsersaun sosiál, tanba prosesu reinsersaun ne’e ba para haree kondisaun vítima nian kona-ba mentalidade, estadu psikolojiku.

“Entaun ho kondisaun mentalidade ne’e, ita-nia maluk ne’e bele re-integra fali ba nia família sira ka lae. Ida-ne’e presiza prosesu naruk no delikadu ida,” nia hateten.

Nia dehan liuhosi nota entendementu ne’e, bele apoiu direitu ida hodi vizita hosi família sira iha prizaun Becora, Gleno no Suai. Ida-ne’e MSSI hakarak tulun atu komunikasaun regular entre família ho vítima labele kotu.

Parte seluk, ministru ne’e hateten atu fó asisténsia ba sira, bainhira sira fila bele muda sira-nia mentalidade liuhosi formasaun karpintária, badaen fatuk nian, suku roupa nian no formasaun seluk tan.

“Ekipamentu ne’e hetan apoiu hosi ita-nia maluk Japaun sira. Atu hanorin ita-nia maluk karpinteiru ne’e iha Gleno no Suai. Sira-ne’e hotu mak tama iha ámbitu nota entendementu ohin ne’e,” ministru esplika.

Ministru hateten bainhira rekluzu sira re-integra ba nia família, sira iha ona mentalidade ba abilidade foun hodi implementa iha sira-nia família nia leet.

Momorandu entendimentu, iha artigu 1° hateten memorandu ida-ne’e, halo parte ba objetivu sosiál ne’ebé VIII Governu Konstitusionál hakarak hetan liuhosi atribuisaun kompeténsia ba MSSI ho enkuadramentu legál iha dekretu lei númeru 9/2019 de 15 de maio no dekretu-lei númeru 10/2019 de 14 de junho.

Iha artigu 2° afirma katak hosi nota entendementu ne’e bele define termu kooperasaun entre Diresaun Nasionál Inkluzaun no Reinsersaun Komunitária (DNIRK) hosi MSSI ho Diresaun Nasionál Servisu Prisionais no Reinsersaun Sosiál (DNSPRS) hosi MJ, kona-ba programa asisténsia sosiál ba apoiu Reinsersaun Eis-rekluzu no vizita família rekluzu.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here