Edifísiu tuan Eskola Ensinu Báziku Filiál terseiru síklu Caicasabu ne’ebé anin sobu, sábadu (06/02). Imajen/facebook.

DILI, 07 fevereiru 2021 (TATOLI)— Anin boot ne’ebé akontese iha semana ne’e, sobu edifísiu tuan Eskola Ensinu Báziku Filiál (EBF) terseiru síklu Caicasabu, suku Babulu, postu administrativu Watulari, Munisípiu Viqueque.

Koordenadór Eskola EBF terseiru síklu Caicasabu, João Baptista, ba jornalista Tatoli via telefónika esplika, edifísiu ne’ebé anin sobu, hanesan edifísiu tuan ne’ebé harii iha 2009 no durante ne’e la uza tanba Governu konstrui ona edifísiu foun ho sala-de-aula tolu iha 2016.

“Anin mak huu no monu duni. Durante ne’e ita la uza ba prosesu aprendizazen, maibé ita rai de’it sasan iha laran hanesan meza, kadeira, armáriu no sasan ba tein merenda eskolár nian,” João Baptista haktuir.

Koordenadór ne’e mós serbisu hamutuk ho komunidade hodi sobu no hasai ona sasan sira ne’ebé rai iha edifísiu laran muda ba fatin seguru.

Alende ne’e, Diretór Serbisu Edukasaun Munisipál Viqueque, Egídio Amaral rekoñese mós katak, anin sobu duni edifísiu tuan Eskola Ensinu Báziku Filiál (EBF) terseiru síklu Caicasabu,  ne’ebé ninia konstrusaun fíziku tuan liu ona tanba didin de’it ho piku.

“Eskola antigu ne’e mak anin sobu, ida foun foin harii besik kedan eskola antigu ho sala-de-aula tolu ne’e anin la sobu,” diretór ne’e mós informa ba Tatoli via telefónika.

Entretantu, eskola Ensinu Báziku Filiál (EBF) terseiru síklu Caicasabu  pertense ba eskola Ensinu Báziku Centrál (EBC) 08 Umusege-Afaloicai, postu administrativu Watulari.

EBF terseiru síklu Caicasabu iha estudante na’in 77 ho profesór permanente na’in-hitu.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here