Mate-isin no pasajeiru na’in-74 to’o iha Aeroportu Internasionál Prezidente Nicolau Lobato, Comoro, sábadu (06/02). Imajen/Espesiál

DILI, 06 fevereiru 2021 (TATOLI)Governu Timor-Leste liuhosi Ministériu Negósiu Estranjeiru no Kooperasaun (MNEK) fasilita ona prosesu lori fila mate-isin traballadór timor-oan na’in-tolu husi Inglatera inklui timor-oan na’in-74 husi país neen.

Mate-isin no pasajeiru hirak ne’e to’o iha Aeroportu Internasionál Prezidente Nicolau Lobato, Comoro, Dili, iha dadeer, sábadu ne’e ho Aviaun Citilink.

Matebian na’in-tolu kompostu husi Cândido Bernardo da Silva hela iha área Aitarak-laran, Dili, Olavio de Asunção no Martinho da Costa Viana husi munisípiu Lautém.

Timor-oan na’in-tolu ne’e, rua mate iha novembru 2020 no ida foin mate iha janeiru 2021 tanba sofre moras.

Enkuantu, pasajeiru na’in-74 kompostu traballadór timor-oan husi Koreia Súl na’in-43, no estudante timor-oan na’in-31 ne’ebé durante ne’e hala’o estudu iha Cabo Verde, Brazíl, Portugál, Thalándia, no Filipina.

Tuir observasaun jornalista Agência TATOLI iha terrenu, mate-isin hatún husi aviaun, akompaña husi ekipa husi Ministériu Saúde, ne’ebé lori ai-moruk dezinfekta hodi rega sira-nia kaixaun, hafoin tula ba ambulánsia ne’ebé akompaña husi família hodi lori ba idak-idak ninia rezidénsia.

Nune’e mós, ba estudante sira, hafoin tun husi aviaun, hetan pasa revista husi ekipa saúde, ne’ebé rega ai-moruk dizinfekta ba sasán no isin-lolon hodi kontinua lori sira bá kuarentena ne’ebé Governu prepara ona iha kapitál Dili.

Antes ne’e, Diretór Asuntu Konsuladu Timor-Leste MNEK, Herminio da Silva Pinto, dehan prosesu lori mate-isin mai tarde, tanba Governu sei halo konsultasaun ho Embaixada Timor-Leste iha rai-li’ur hodi fasilita prosesu sira.

Jornalista: Eugénio Pereira

Editora: Julia Chatarina

HAKEREK NO HATÁN

Please enter your comment!
Please enter your name here