Diretór Nasionál Empregu Esteriór SEFOPE, Filomeno Soares. Imajen TATOLI/Joanico de Araújo

DILI, 05 fevereiru 2021 (TATOLI)Sekretaria Estadu Formasaun Profisionál no Empregu (SEFOPE) sei haruka traballadór timor-oan serbisu iha Korea Súl tanba kontratu ho kompañia iha ona maibé hafoin aeroportu país rua loke.

“Traballadór sira ne’e regulár, sira ne’e halo ona teste no foin primeira vez atu bá, kontratu ne’ebé tama hamutuk 460 ne’ebé hein atu aranka de’it. Maibé agora kontratu tama hotu iha commercial flight, tanba ne’e presiza haree, tanba Korea Súl seidauk simu traballadór no ita-nia commercial flight seidauk reativa, tanba ne’e se hein,” Diretór Nasionál Empregu Esteriór (DNEE), Filomeno Soares, informa ba Agência TATOLI, sesta ne’e, via telelefone.

Aeroportu Korea Súl daudaun taka hela, tanba ne’e sira labele simu traballadór husi fatin seluk inklui Timor-Leste.

“Korea Súl hanesan nasaun ne’ebé esporta traballadór, ne’ebé iha nasaun 16 inklui Timor-Leste mak manda traballadór bá, entaun regulamentu ne’ebé sira uza atu simu traballadór aplika ba nasaun hotu,” nia esplika.

Aleinde ne’e, iha mós traballadór timor-oan mak sei ba serbisu fali (re-entry) hamutuk na’in-41 ne’ebé preparadu atu aranka.

“Sira ne’e diferente oituan ho regulár, tanba sira bá serbisu ona iha Korea Súl no daudaun hetan kontratu atu bá fali, sira presiza halo teste COVID-19 de’it, kuandu negativu bele tama kuarentena no ba serbisu de’it ona, maibé kompañia ne’ebé bolu sira hetan difikuldade hotu iha voo komersiál,” nia akresenta.

Enkuantu ba traballadór regulár ne’ebé foin atu bá, sei tuir teste saúde.

“Kuandu ita aluga aviaun maka lori sira ba teste saúde iha Korea, maka sei lakon tanba ita la prevee osan atu haree kestaun ne’e, tanba sira sei tama kuarentena iha loron hira nian laran, diferente ho traballadór re-entry sira,” Diretór ne’e hatutan.

Responsável ne’e adianta, kontratu traballadór timor-oan serbisu iha Korea Súl diferente ho Austrália.

“Iha Korea Súl uza sistema random, ne’ebé kompañia mai ba Ministériu asuntu Traballu, submete pedidu ida ba sistema no ida ne’ebé  naran sai mai kompañia sira foti maka sira manda naran sira,” nia tenik.

Naran traballadór husi Korea Súl ba SEFOPE, hanesan naran ne’ebé liu ona lian korea, hafoin halo aplikasaun ba viza serbisu.

“Husi ne’ebá maka manda naran sira ne’e mai katak ema sira ne’e bele mai no sira manda mós kontratu filafali liuhosi sistema hodi haruka sira bá serbisu, entaun ida-ne’e maka ami prepara”, nia realsa.

To’o tinan 2020, traballadór timor-oan hamutuk 3.000-resin maka serbisu iha Korea Súl

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here