Ilustrasaun violénsia iha uma-laran. Imajen/detik.com

DILI, 05 fevereiru 2021 (TATOLI)- Komandu Polísia Munisípiu Dili, Eskuadra Vera Krús Dili, loke ona investigasaun ba kazu la’en taa kanek feen to’o oin, inus no liman kanek maka’as.

Kazu tentativa omisídiu ne’e akontese iha vítima no suspeitu nia rezidénsia iha área Surikmas- Dili, sesta ne’e, purvolta tuku 07:45 dadersán

Segundu Komandante Polísia Munisipiu Dili, Superintendente Euclides Belo, relata suspeitu ho inisiál FAB lori arma branka taa nia espoza rezulta oin, inus kotu, kakorok ho liman naklees.

“Suspeitu ho vítima nu’udar feen ho la’en,” Superintendente Euclides Belo informa ba jornalista iha Komandu PNTL, Dili.

PNTL evakua ona vítima ba Ospitál Nasionál Guido Valadares (HNGV) hodi halo operasaun no tratamentu intensivu.

Hafoin taa vítima, suspeitu halai hosi uma to’o agora parte Servisu Informasaun Polísia (SIP) koordena ho família, autoridade lokál ho Membru Konsellu Polisiamentu Komunitáriu (KPK) sira sei buka tuir suspeitu nia paradeiru.

Kazu ne’e PNTL rejista ho númeru kriminál NUK 0031/2021 no tuir rezultadu investigasaun provizóriu katak, vítima no suspeitu iha problema privadu ne’ebé akontese beibeik ona to’o suspeitu sente lad’iak lori sasán kro’at tenta oho vítima.

Antes ne’e, vítima mós hamosu problema krime ba suspeitu, tanba vítima rejistu ho númeru krime NUK 0660/2021, tanba lori bee-manas fakar ba suspeitu nia isin lolon hodi hamosu problema entre sira na’in-rua.

“Vítima mós antes ne’e komete iha krime ida fakar bee-manas ba suspeitu,” nia hateten.

Ekipa PNTL sei kontinua halo nafatin investigasaun kle’an molok aprezenta prosesu ba Ministériu Públiku.

Jornalista  :  Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here