Provedora, Jesuína Maria Ferreira Gomes ho Prokuradór Jerál Repúblika, José Ximenes, asina terku kooperasaun instituisaun rua iha edifísiu PGR, Colmera, Dili, sesta (05/02/2021). Imajen/Nelson de Sousa

DILI, 05 fevereiru 2021 (TATOLI)-Provedoria Direitu Umanu no Justisa (PDHJ), sesta ne’e, estabelese asina akordu kooperasaun ho Prokuradoria Jerál Repúblika (PGR)  hodi fortalese servisu mútua institusionál ba periodu tinan haat (2011-2024).

Akordu ne’e asina direita hosi Provedora PDHJ, Jesuína Maria Ferreira Gomes ho Prokuradór Jerál Repúblika, José Ximenes, iha edifísiu PGR, Colmera, Dili.

Akordu ne’e foka ba area  tolu hanesan; dahuluk defeza ba legalidade ka promove defeza legalidade demokrátika, iha matéria ida ne’e PGR laiha kompeténsia ba halo fiskalizasaun abstrata inkonstitusionalidade maibé PDHJ iha kompeténsia nune’e parte rua promove hodi fó defeza  ba legalidade demokrátika.

Daruak, promove no defeza sidadaun sira-nia direitu umanu, liu-liu direitu ne’ebé atu hetan prosesu ne’ebé ho lalais no iha direitu atu aprezenta keixa hodi hatene prosesu keixa ne’ebé lao hela no o datoluk hamutuk promove asaun penál.

Jesuína Maria Ferreira Gomes, informa akordu ne’e  atu intensifika hodi dezenvolve di’ak liu tan kooperasaun entre  PDHJ ho PGR  atu servisu hamutuk mellora servisu fasilita sidadaun sira nia solisitasaun.

‘’Bainhira PDHJ simu keixa iha indísiu prátika krime hodi haruka ba iha PGR no PDHJ tenke informa fila-fali ba kesar na’in kona-ba notísia krime,’’ Jesuína Maria Ferreira Gomes hateten.

Nia afirma, ho estabelesimentu akordu atu mellora liu tan  partilla informasaun entre instituisaun rua hodi fasilita sidadaun  sira.  Aleinde fó formasaun tékniku ba funsionáriu sira iha instituisaun rua ho sira seluk.

PGR José Ximenes, afirma razaun asina akordu ne’e atu formaliza an de’it tanba instituisaun rua ne’e ninia papél no kompeténsia la hanesan maibé nia objetivu finál ida de’it tuir akordu ne’ebé estabelese.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here