Estudante Fakuldade Medisina, Siénsia no Saúde (FMSS), Universidade Nasionál Timor Lorosa’e (UNTL). Foto: FMSS

DILI, 04 fevereiru 2021 (TATOLI)— Ajénsia Nasionál Avaliasaun Akreditasaun Akadémiku (ANAAA) prepara hela atu halo avaliasaun ba kursu programátiku 50 iha Instituisaun Ensinu Superiór Públiku no Privadu (IESPP) hamutuk 14, iha tinan ne’e. 

Diretór ezekutivu ANAAA, Edmundo Viegas, hateten alende halo avaliasaun akreditasaun programátiku ba kursu 50 ne’e, sei halo mós avaliasaun akreditasaun ba IESPP sia (9) ne’ebé sira-nia akreditasaun kompleta ona tinan lima (5).

Notísia Relevante:ANAAA avalia ona kursu 105, ida taka

“Kursu 50 no instituisaun sia ne’ebé atu hetan avaliasaun ne’e iha ámbitu akreditasaun programatíku no akreditasaun institusionál,” Edmundo Viegas ko’alia ba jornalista Agência Tatoli, kinta (04/02).

Nia esplika, kursu 50 ne’e mai hosi instituisaun 11 ne’ebé tuan, inklui instituisaun foun 3 hanesan Institutu Superiór São João de Brito Kasait, Institutu Superiór Filozofia no Teolojia Don Jaime Garcia Goulart Fatumeta no Institutu São Francisco de Sales (ISFS) Comoro.

Alende ne’e, instituisaun sia ne’ebé atu hetan avaliasaun akreditasaun institusionál ba dala-tolu mak hanesan Universidade Nasionál Timor Lorosa’e (UNTL), Universidade da Paz (UNPAZ), Institute Of Business (IOB), Institutu Profisionál de Canossa (IPDC), Dili Institute of Technology (DIT), Institutu Superiór Cristál (ISC), Instituto Katólika Formasaun Profesores (ICFP) Baucau no Institutu Siénsia Relijioza (ICR) Lahane.

Edmundo Viegas konsidera institutu hitu no universidade rua ne’e tenki tuir fali akreditasaun institusionál, tanba besik kompleta ona tinan lima no presija halo hikas avaliasaun ba sira.

Bainhira instituisaun sia ne’e hetan avaliasaun iha tinan ida ne’e, maka ANAAA konsidera tama iha avaliasaun ba dala-tolu.

“Maibé, UNDIL no UNITAL hetan ona akreditasaun institusionál dala-rua iha 2019 no ISFIT, ISFS no Institutu Siénsia Saúde (ICS) foin mak hetan akreditasaun institusionál dala ida,” Edmundo Viegas salienta.

Objetivu hosi avaliasaun ne’e atu haree sira nia progresu no atinjimentu saida mak sira iha, tanba ne’e ANAAA iha esperansa katak,  instituisaun sia ne’e iha ona esperiénsia bele hatudu tan progresu di’ak ruma iha periúdu datoluk ne’e, hodi bele manan liutan konfiansa.

“Ami nia tarjetu ba tinan ida ne’e atu halo avaliasaun ba kursu 50, maibé bele menus no bele liu, depende ba preparasaun ne’ebé hatuur ona iha relatóriu altu avaliasaun,” diretór ezekutivu ne’e hateten.

Tuir dadus ne’ebé iha, ANAAA rejista kursu programátiku atu halo avaliasaun hamutuk 205, no hosi númeru ne’e iha kursu 105 mak hetan ona avaliasaun, falta kursu 100 mak seidauk hetan avaliasaun inklui kursu 20 ba mestradu ka pós graduasaun.

Hosi parte ANAAA rasik iha esperansa katak, iha tinan ne’e bele realiza avaliasaun ba kursu 50 atu nune’e tinan oin bele halo tan avaliasaun ba kursu 50, hodi bele konklui númeru kursu programatíku rejistadu.

To’o oras ne’e ANAAA rejista ona institutu superiór hamutuk 18, hosi númeru ne’e iha institutu superiór sanulu resin haat mak hetan ona akreditasaun no haat mak seidauk hetan akreditasaun.

Tinan ne’e ANAAA prevee rihun $426 hosi Orsamentu Jerál Estadu (OJE), sei uza ba operasionál no avaliasaun akreditasaun kursu 50 ho akreditasaun instituisaun sia ne’e hamutuk rihun $360.

Jornalista: Tomé Amado

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here