Diretór Ezekutivu ANAAA, Edmundo da Silva Viegas. Foto: UNILAB

DILI, 02 fevereiru 2021 (TATOLI)—Diretór Ezekutivu Ajénsia Nasionál Avaliasaun Akreditasaun Akadémiku (ANAAA) Edmundo Viegas, informa Ministériu Ensinu Superiór Siénsia no Kultura (MESSK) kontinua hein Universidade Nasionál Timor Lorosa’e (UNTL), atu rejista hikas kursu Edukasaun Fízika Desportu (EFD) ne’ebé la hetan akreditasaun iha 2018.

Diretór Edmundo rekoñese katak, kursu EFD iha UNTL ho nível baxarelatu ne’ebé antes ne’e la hetan akreditasaun la ezisti ona.

Tanba ne’e, nia dehan, loloos iha oportunidade atu hetan fali re-akreditasaun iha 2020, maibé UNTL la responde no la kumpre durasaun tempu tinan rua atu halo fali pedidu ba MESSK hodi hetan lisensa, nune’e bele loke fali kursu foun ho naran hanesan, maibé ninia nível akadémiku ba lisensiatura.

“Ita konsidera UNTL kria hela kazu ida ho kursu EFD ne’ebé la hetan akreditasaun hosi ANAAA iha 2018, tanba sira la halo pedidu atu hetan fali re-avaliasaun hodi hetan re-akreditasaun ba kursu ne’ebé la liu. Maibé, sira halo fali planu hodi muda fali estatutu kursu EFD nian ba fali nível lisensiatura. Tanba ne’e, ANAAA konsidera kursu EFD ho grau baxarelatu la ezisti ona iha UNTL,” Edmundo, ba jornalista Agência Tatoli iha ninia serbisu fatin Matadouru, tersa (0202).

Edmundo dehan, MESSK husu ba UNTL bele hatama pedidu iha tinan ida ne’e atu bele halo avaliasaun hodi hetan lisensa operasionál hosi MESSK rasik, ba kursu foun ne’ebé sira atu loke.

“ANAAA seidauk bele halo buat barak, tanba sei hein hela desizaun hosi MESSK. Bainhira pedidu UNTL nian hetan ona lisensa maka ANAAA bele hato’o rekomendasaun,” nia subliña.

Entretantu, kursu Edukasaun Fízika Desportu ne’ebé transforma ninia nível akadémiku ba lisensiatura ne’e atu hetan akreditasaun tenki kumpre padraun 10 ne’ebé ANAAA fó.

“Tenki kria kondisaun ida di’ak liuliu kompleta fasilidade desportu hodi bele manan konfiansa ANAAA nian iha prosesu avaliasaun tuir mai,” Edmundo akresenta.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here