iklan

NASIONÁL, EKONOMIA, DILI, HEADLINE, KAPITÁL, LEI, SEGURANSA

Janeiru, Tránzitu Dili kontribui $25,351.00 ba kofre Estadu

Janeiru, Tránzitu Dili kontribui $25,351.00 ba kofre Estadu

Komandante Polísia Unidade Tránzitu Dili, Inspetór Domingos Sarmento Gama. Imajen Tatoli/Eugénio Pereira

DILI, 03 fevereiru 2021 (TATOLI)- Durante loron 01 to’o 31 janeiru 2021, Komandu Polísia Munisípiu Dili, Seksaun Unidade Tránzitu rekolla osan hamutuk $25,351.00 hodi kontribui ba kofre Estadu.

Komandante Polísia Tránzitu Munisípiu Dili, Inspetór Domingos Sarmento Gama, relata osan ne’e rekolla hosi infratór na’in-1174 liu ne’ebé selu multa tanba viola kódigu tránzitu hanesan, lori motór la iha asesória hamutuk infrasór na’in-25, para iha kruzamentu ka kurva (na’in-16), para iha zebra cross leten (na’in-haat), la iha SNTK (na’in-100), KEER inválidu (na’in-114), la iha Karta Kondisaun (na’in-120), apreensaun ba karreta Estadu (na’in-lima), karreta privadu (31), motór privadu (439), karreta públiku (38), totál tiketi infrasaun 661, totál evidénsia 1174 no orsamentu $25,351.00.

Seksaun Tránzitu Dili mós prosesa kazu krime-rua ba Ministériu Públiku ne’ebé envolve motorista na’in-rua kondús transporte la iha Karta Kondusaun.

Biban ne’e, Inspetór Domingos Gama, informa ba jornalista sira, kuarta ne’e, katak operasaun pasa revista ba transporte públiku ne’e sira halo apreensaun mós ba motorizada membru PNTL no F-FDTL, veteranu, deputadu no membru Governu balun viola regra sira mós selu multa ba Estadu hodi hatudu ezemplu di’ak ba ema sivíl sira atu kumpre mós regra.

Nia dehan, dala-ruma polísia halo apreensaun ba motorizada públiku sira kestiona hodi akuza membru PNTL sira sempre fó fila família sira nia transporte nu’udar informasaun ne’ebé laloos.

Rejista asidente 78

Inspetór Domingos dehan, seksaun Tránzitu Dili mós rejista kazu asidente hamutuk 78 maka akontese iha área Munisípiu Dili nian ne’ebé rezulta vítima balun sofre kanek todan, no kanek kaman maibé laiha mate.

Inspetór Domingos halo komparasaun ba dadus asidente tráfegu iha janeiru 2021 ki’ik liu, bainhira halo komparasaun ho tinan 2019 kazu asidente rezulta ema na’in 27 mate no tinan 2020 rejista kazu ema na’in-19 mate.

Tuir PNTL nia observasaun asidente barak rezulta ema mate, tanba maioria viajen la uza kapasete no monu rezulta ulun nakfera.

“Ema barak mate, tanba monu ulun rahun, tanba sira sa’e motór la uza kapasete,” nia hateten.

Tuir rezultadu investigasaun Tránzitu Dili mós nota maioria vítima sira monu ho motór konsidera 95% problema estrada aat ka kois, no 5% motorista sira lanu todan.

Hosi kazu hirak ne’e, vítima sira ne’ebé soke deside rezolve problema tuir dalan familiar rejistu 32,  ba tribunál zero (0) no kazu sei iha prosesu hamutuk 46.

 Jornalista  : Eugénio Pereira

Editór        : Francisco Simões

iklan
iklan

Leave a Reply

iklan
error: Content is protected !!