Diretór Ezekutivu Asosiasaun HAK, Sisto dos Santos. Imajen TATOLI/Egas Cristovão.

DILI, 03 fevereiru 2021 (TATOLI)-Diretór Ezekutivu Asosiasaun HAK, Sisto dos Santos, husu ba servisu Defensoria  Públiku atu  hadi’a atendimentu ka asisténsia legál ba povu ki’ik no kbiit-laek sira ne’ebé presiza justisa.

Tuir monitorizasaun HAK nian  iha situasaun balun suspeitu ka arguidu nu’udar povu ki’ik sente prejudikadu ka lakon justisa hodi hasoru injustisa durante iha prizaun la hetan akompañamentu regular di’ak hosi parte defeza, nune’e difisil atu defende sira  hodi hetan lia-loos.

Notísia Relevante : Defensór Públiku Presiza Toma Atensaun Ba Dadur Sira

Sisto dos Santos dehan situasaun balun akontese suspeitu sira kumpre tiha  prizaun preventiva to’o tinan ida liu ikus mai desizaun tribunál absolve tanba inosente, ida ne’e tanba durante prosesu la’o parte defeza ladún iha asisténsia másima  hodi defende.

“Dala-ua’in kuaze domina kazu sira  ne’ebé  ladún estratéjiku defensór ka advogadu sira la presiza hasoru, maibé so ba ema importante, nune’e iha prizaun preventiva to’o mai tribunál mak hasoru kliente ikus mai la domina kazu  ne’e no juis sira mós foti desizaun la adekuadu,” Sisto dos Santos hato’o nia observasaun ne’e hodi responde Agência TATOLI iha Faról, kuarta ne’e.

Nia hateten, situasaun ne’e  serteza ba lia-loos la’ós ba ema julgadu de’it, maibé mós ba komunidade bele lakon konfiansa ka laiha vontade hodi kontribui ba lia-loos no ida ne’e viola prinsípiu direitu umanu.

“Ami nia rekomendasaun ho situasaun sira ne’e mak aumenta númeru defensór, nune’e bele fó asisténsia regular ho di’ak liubá kliente sira iha prizaun,” Sisto dos Santos hateten.

Defensoria hola nia misaun atu fó asisténsia jurídika judisiál no extra-judisiál ba sidadaun tanba ne’e servisu defensoria hanesan servisu sosiál fó asisténsia jurídika, judisiáriu no extra-judisiál ne’ebé garante iha artigu 135 Konstituisaun Repúblika Demokrátika Timor-Leste ne’ebé esensiál hodi salva guarda direitu lejítimu sidadaun sira.

Jornalista   : Nelson de Sousa

Editór        : Francisco Simões

1 KOMENTÁRIU

  1. Apresia ho senhor Diretor nia apresiasaun. Tuir ha’u nia hanoin, tribunal, defensoria publika no Ministeriu publiku ne’e presiza hetan avaliasaun ba sira-nia dezempenhu se lae justisa ne’e ba ema boot de’it, ba povu ki’ik la iha.

HAKEREK NO HATÁN

Please enter your comment!
Please enter your name here